Samarqand shahrida 22-oktyabr kuni O‘zbekiston Respublikasi Bosh vaziri Abdulla Aripov Qozog‘iston Respublikasi Bosh vaziri Oljas Bektenov boshchiligida O‘zbekiston-Qozog‘iston to‘rtinchi hududlararo hamkorlik forumi bo‘lib o‘tdi. Bu haqda Bosh vazir matbuot kotibi xabar berdi.

Forumda ikki mamlakatning barcha hududlari vakillari hamda uning doirasidagi davra suhbatida 200 ga yaqin tadbirkor ishtirok etdi.

So‘nggi 7-yil ichida O‘zbekiston va Qozog‘iston o‘rtasida o‘zaro savdo aylanmasi deyarli 2,5 barobar o‘sib, o‘tgan yili 4,4 milliard dollarni tashkil etdi. Bugungi kunda O‘zbekistonda Qozog‘iston kapitali ishtirokida mingdan ziyod korxonalar, Qozog‘istonda esa – 3 600 dan ortiq O‘zbekiston kapitali ishtirokida korxonalar o‘z faoliyatini yuritmoqda.

Forumda mavjud zaxiralardan samarali foydalangan holda, yaqin yillarda o‘zaro savdo hajmini 10 milliard dollarga yetkazish choralari yuzasidan atroflicha fikr almashildi.

O‘zbekiston va Qozog‘iston o‘rtasidagi uzoq muddatli sheriklikni kengaytirishda hududlararo aloqalar haqiqiy muhim sanaladi. Xususan, chegaradosh hududlar Qoraqalpog‘iston Respublikasi Mang‘istau viloyati bilan, Toshkent viloyati Turkiston viloyati bilan, Navoiy viloyati Qizilo‘rda viloyati bilan to‘g‘ridan to‘g‘ri va yaqin aloqalar o‘rnatgan.

Chegaradosh bo‘lmagan hududlarimiz ham o‘zaro aloqalarni mustahkamlab, savdo-sotiq va sanoat kooperatsiya aloqalarini izchil rivojlantirib kelmoqda.

O‘zbekiston-Qozog‘iston to‘rtinchi hududlararo forumi yakunlari bo‘yicha qator hujjatlar imzolandi.