2024-yilning yanvar-sentyabr oylarida O‘zbekistonda tug‘ilish darajasi 3,2%ga qisqargan bo‘lib, jami 693 897 nafar yangi tug‘ilganlar qayd etilgan (o‘tgan yilning shu davrida — 716 885). Tug‘ilish shaharlarda yuqoriroq sur’atda kamaymoqda. Bu haqda Statistika agentligining O‘zbekistonning demografik holati haqida e’lon qilgan statistikasida ma’lumot keltirilgan.

Tug‘ilishning eng yuqori darajasi Surxondaryoda kuzatilgan, tug‘ilish koeffitsiyenti 30,8 promilledan 29,0 promillega pasaygan. Eng past tug‘ilish ko‘rsatkichi Qoraqalpog‘istonda qayd etilgan — koeffitsiyent 21,8 promilledan 20,6 promillegacha tushgan.

Nikohlanishlar soni 179,4 minggacha qisqargan, bu 2016-yildan beri eng past ko‘rsatkich hisoblanadi. Qishloq hududlarida nikohlanish sur’ati shaharlarga qaraganda tezroq pasaymoqda.

Erkaklarning o‘rtacha nikoh yoshi 27,4 yoshga yetgan, ayollarniki esa 22,5 yoshda o‘zgarmay qolgan.

O‘lim holatlari oshgan bo‘lsa-da, ajralishlar soni 3 yil davom etgan o‘sishdan keyin qisqargan.

Xorijga ko‘chib ketganlar soni o‘tgan yilning mos davri bilan solishtirganda 6 ming 292 nafarga oshib 14 ming 666 kishini tashkil etgan.

Hozirda O‘zbekistonning doimiy aholisi 37 million 335 ming nafarga yetgan. Bu demografik o‘zgarishlar mamlakatda aholi o‘sish sur’atlarining pasayishiga ta’sir ko‘rsatmoqda.