Fitch Ratings халқаро рейтинг агентлиги Ўзбекистоннинг узоқ муддатли хорижий валютадаги кредит рейтингини «BB-» дан «BB» даражасига оширди. Рейтинг бўйича прогноз «барқарор» деб баҳоланди.

Ўзбекистон нега бу рейтинг даражасини олди

Ушбу даража берилишига молиявий тизим, давлат корхоналари ва тариф сиёсатидаги ўзгаришлар, шунингдек, давлат бошқаруви ва шаффофликни ошириш бўйича босқичма-босқич чора-тадбирлар Fitch томонидан ижобий баҳоланишига сабаб бўлди.

Шунингдек, 2024 йилда буджет тақчиллиги ЯИМга нисбатан 3 фоиз атрофида бўлиб, кутилганидан яхшироқ натижани кўрсатди. Энергия субсидиялари камайтирилгани фискал барқарорликка ижобий таъсир қилди.

1 июнь ҳолатига кўра, валюта захиралари (асосан олтин) $49,7 миллиардга етди. Бу ташқи тўловларни 10 ой давомида қоплаш имконини беради.

Давлат қарзи 2025–2026 йилларда ЯИМга нисбатан 32 фоиз атрофида бўлиши кутилмоқда. Бу кўрсаткич «BB» рейтингидаги давлатлар ўртача даражасидан анча паст.

2025–2026 йилларда Ўзбекистон иқтисодиёти 6,3 фоиз ўсиши кутилмоқда. Бу хизматлар соҳаси кенгайиши, ислоҳотлар ва экспортга бўлган талаб билан боғлиқ.

Йиллик инфляция 2025 йил май ойида 9 фоиздан пастга тушди. Депозитлардаги доллар улуши эса 24,5 фоизгача камайган.

Рейтингга салбий таъсир кўрсатувчи омиллар

Фитч агентлиги қуйидаги ҳолатлар рейтингга салбий таъсир кўрсатиши мумкинлигини қайд этди:

• Ташқи савдо тақчиллиги ёки пул ўтказмалари пасайиши;
• Давлат қарзининг кескин ошиши ёки буджет захиралари камайиши;
• Товар нархларидаги ўзгаришларга юқори боғлиқлик.

Рейтинг янада ошиши мумкин бўлган ҳолатлар:

• Структуравий ислоҳотлар чуқурлашиши;
• Давлат бошқаруви ва коррупцияга қарши курашда жиддий ютуқларга эришиш;
• Давлат молиясида барқарор тежамкорлик таъминланиши.

Фитч агентлиги Ўзбекистонда инфляцияни пасайтириш, ислоҳотларни чуқурлаштириш ва молиявий барқарорликни таъминлаш бўйича ижобий силжишлар давом этишини кутмоқда.