Makroiqtisodiy va hududiy tadqiqotlar instituti (MHTI) mutaxassislari Toshkent shahrida ko‘p qavatli uy-joylarga investitsiya qilish daromadliligini tahlil qildi. Natijalar uy-joy narxlari o‘sishining susayishini ko‘rsatmoqda.

Fevral oyida Toshkentdagi uy-joylarning o‘rtacha daromadliligi 32,4% bo‘lgan bo‘lsa, oktyabrda bu ko‘rsatkich 12,2%ga tushdi. Xonadon turi va joylashuviga ko‘ra daromadlilik quyidagicha farqlandi:
– 1 xonali xonadonlar:
– Mirzo Ulug‘bek: Fevral oyida 25,7%dan oktyabrda 2,3%ga pasaygan.
– Shayxontohur: Fevralda 50%, oktyabrda 17%.
– 2 xonali xonadonlar:
– Sirg‘ali: Fevralda 19,4%, oktyabrda 7,4%.
– Shayxontohur: Fevralda 59%, oktyabrda 17,2%.
– 3 xonali xonadonlar:
– Bektemir: Fevralda 33,7%, oktyabrda 3,2%.
– Yunusobod: Fevralda 48,7%, oktyabrda 13,7%.
– 4 xonali xonadonlar:
– Bektemir: Fevralda 37,9%, oktyabrda 2%.
– Yunusobod: Fevralda 39,8%, oktyabrda 17%.

Uy-joy narxlari o‘zgarishi natijasida olinadigan daromad ham pasaymoqda. Fevral oyida Shayxontohur tumanida uy-joy narxlari o‘sishi hisobiga daromad 35,8%ni tashkil qilgan bo‘lsa, oktyabrda bu ko‘rsatkich 5,5%gacha tushdi. Xuddi shunday, Mirobod (23,2%dan 1,9%gacha) va Yakkasaroy (16,1%dan 3,5%gacha) tumanlarida ham pasayish kuzatildi. Mirzo Ulug‘bek (-2,6%) va Uchtepa (-2,4%) tumanlarida esa hatto salbiy natijalar qayd etilgan.

Uy-joylarni ijaraga berishdan olinadigan yillik daromad ham o‘zgarishsiz qolmadi:
– Shayxontohur: Oktyabr oyida 10% (fevralda 11,6%).
– Mirobod: Oktyabrda 9,8% (fevralda 10,4%).
– Yakkasaroy: Oktyabrda 9,5% (fevralda 10,5%).
Ijara narxlari nisbatan arzon bo‘lgan Sirg‘ali (9,3%), Uchtepa (9,7%) va Chilonzor (9,3%) tumanlarida barqarorlik saqlangan. Taqqoslash uchun, milliy valyutadagi depositlarning o‘rtacha yillik foizi 21%ni tashkil etdi.