O‘mon sultonligining Sohar International banki O‘zbekiston bozoriga kirishga jiddiy qiziqish bildirmoqda. 29-noyabr kuni Markaziy bank rahbariyati va bank vakillari o‘rtasida o‘tkazilgan uchrashuvda, «Sohar International» bankining O‘zbekiston bank tizimiga kirish rejalarini va o‘zaro hamkorlikni rivojlantirish istiqbollarini muhokama qilishdi. Bank vakillari o‘zining strategik qarashlarini taqdim etib, O‘zbekiston bank tizimining yuqori investitsion salohiyatini ta’kidladi va mamlakatning moliya bozorida o‘z o‘rnini egallashga qiziqish bildirdi. Bu haqda Markaziy bank matbuot xizmati xabar berdi.

Uchrashuvda, «Sohar International» banki vakillari O‘zbekiston bozorining o‘sish potentsiali va bu yerda faoliyat yuritish imkoniyatlarini yuqori baholadi. Markaziy bank esa, o‘z navbatida, mamlakatda moliya bozorini rivojlantirish va xorijiy investitsiyalarni jalb etish bo‘yicha amalga oshirilayotgan islohotlar haqida batafsil ma’lumot berdi. Shu bilan birga, bank sohasida xalqaro standartlarni joriy etish borasida olib borilayotgan ishlar ham alohida ta’kidlandi.

Shu o‘rinda, O‘zbekistonning moliya bozoriga xorijiy banklarning kirib kelishi sezilarli o‘sishda davom etmoqda. Sentabr oyida Markaziy bank, Xitoyning Eksim bankining vakolatxonasini akkreditatsiyadan o‘tkazdi. Noyabr oyida esa, ushbu bank Toshkentda o‘zining mintaqaviy vakolatxonasini ochdi. Eksim banki O‘zbekistondan tashqari yana 7ta mamlakatda faoliyat yuritadi, bu esa mamlakatning moliyaviy bozori uchun yanada yangi imkoniyatlarni ochadi.

«Sohar International» banki 2007-yilda O‘monda tashkil etilgan bo‘lib, bank oltita operatsion segmentda faoliyat ko‘rsatadi, jumladan, ulgurji va chakana bank xizmatlari, davlat va xususiy loyihalarni moliyalashtirish, investitsiyalar, g‘aznachilik va islomiy banking. Moliyaviy muassasa o‘z faoliyatini bir nechta mintaqalarda yuritadi, uning daromadi $781 millionni tashkil etadi va xodimlar soni 1,5 mingdan ortiq.