Samarqandda 2,2 mln dollarlik «svet»dan noqonuniy foydalangan mayning ferma aniqlandi
Samarqand viloyatida elektr energiyasidan noqonuniy foydalanish holati fosh etildi. O‘tkazilgan tezkor tadbir natijasida Ishtixon tumanidagi "M.G.M." oilaviy korxonasiga qarashli 89 ta mayning qurilmasi to‘g‘ridan-to‘g‘ri tarmoqqa ulanib, 2,2 million dollar (28,9 milliard so‘m) miqdoridagi elektr energiyasini talon-toroj qilgani aniqlandi.
Samarqand viloyatida yirik miqdorda elektr energiyasidan noqonuniy foydalanish holati fosh etildi. Bu haqda inspeksiya matbuot xizmati xabar berdi.
O‘tkazilgan tezkor tadbirda Ishtixon tumanidagi «M.G.M.» oilaviy korxonasiga tegishli binoning yon tomonidagi yerto‘lada 244,4 kVt quvvatga ega 89 ta mayning qurilmasi aniqlandi. Ushbu qurilmalar elektr hisoblagichni chetlab o‘tib, to‘g‘ridan-to‘g‘ri tarmoqqa ulanib, noqonuniy ravishda elektr energiyasidan foydalanib kelgan.
Dastlabki hisob-kitoblarga ko‘ra, bu noqonuniy foydalanish orqali 28 milliard 896 million so‘mlik elektr energiyasi o‘g‘irlangani ma’lum bo‘ldi.
Holat yuzasidan huquqni muhofaza qiluvchi organlar tomonidan tegishli hujjatlar rasmiylashtirildi va jinoiy ish qo‘zg‘atildi.
Bundan oldin, Samarqand viloyatining boshqa hududlarida ham mayning fermalarida noqonuniy elektr energiyasidan foydalanish holatlari aniqlangan edi. Jumladan, oktyabr oyida 55 ta qurilma orqali 5,5 milliard so‘mlik elektr energiyasi noqonuniy ravishda ishlatilgani ma’lum bo‘lgan.
Shuningdek, Navoiy shahrida 106,5 million so‘mlik, Yuqori Chirchiq tumanida esa 139,9 million so‘mlik elektr energiyasi o‘g‘irlangani haqida ham ma’lumotlar mavjud.
