2025-yil boshida O‘zbekistonda issiqlik ta’minoti narxlari ikki barobar oshishi rejalashtirilmoqda. Bu haqda Qurilish va uy-joy kommunal xo‘jaligi vazirligi xabar berdi. 

To‘rayevning so‘zlariga ko‘ra, issiqlik ta’minoti tariflari elektr energiyasi va tabiiy gaz narxlari bilan bog‘liq holda indeksatsiya qilinishi mumkin. 2024-yil davomida esa Toshkentda issiqlik narxlari ikki marotaba, viloyatlarda esa bir marotaba oshirilgan edi.

2025-yilda narxlarni ikki marotaba oshirish, ayniqsa, viloyatlarda amalga oshirish rejalashtirilmoqda. Bu, o‘z navbatida, davlat tomonidan to‘lanadigan katta subsidiya summalarini qisqartirish, shuningdek, issiqlik ta’minoti tizimini yangilash zaruratidan kelib chiqmoqda. «Subsidiyalardan qutulish va tizimni samarali boshqarish uchun tariflarni qayta ko‘rib chiqish zarur», — deya ta’kidladi To‘rayev.

Ilhom To‘rayev, shuningdek, xorij tajribasini o‘rganish asosida to‘lov tizimini takomillashtirishga harakat qilinayotgani haqida ham ma’lum qildi. Masalan, Janubiy Koreyada uylarning minimal issiqlik darajasini saqlash uchun abonentlardan to‘lov olinadi. Bu kabi tajribalar O‘zbekistondagi tarif siyosatini takomillashtirishda asos bo‘lishi mumkin.

Toshkentda aholi va tadbirkorlar uchun issiqlik va issiq suv ta’minoti narxi 2024-yilning oxiriga kelib 15 foizga oshirildi. Shuningdek, kelasi yilda poytaxtdagi tariflar yana qayta ko‘rib chiqilishi mumkin. «Veolia Energy Tashkent» kompaniyasi yangi tarifni «majburiy qadam» deb atab, yangi narxlar bazaviy tarifning atigi 18 foizini qoplashi haqida xabar bergan edi.