20-dekabr kuni Toshkent shahrining Yakkasaroy tumanidagi «Askiya» bozori va uning atrofidagi 1,83 gektar yer maydoni uchun o‘tkazilgan kimoshdi savdosida Sheng Ke-International kompaniyasi 225,59 milliard so‘mlik taklif bilan g‘olib bo‘ldi. Ushbu savdoda faqat ikki ishtirokchi qatnashdi. Auksion 15 daqiqa davom etib, yagona stavka bilan yakunlandi.

Savdo «E-auksion» platformasida amalga oshirildi. Xitoyning Sheng Ke-International kompaniyasi boshlang‘ich narxdan 5% yuqori bo‘lgan taklif bilan g‘oliblikni qo‘lga kiritdi. Mazkur kompaniya 23-mayda ro‘yxatdan o‘tgan bo‘lib, ixtisoslashgan qurilish ishlari bilan shug‘ullanadi. Kompaniyaning ustav fondi 68 milliard so‘mni tashkil etadi va uning ta’sischisi Chen Maysyuan boshqaruvidagi Qozog‘istonda ro‘yxatdan o‘tgan MCHJ hisoblanadi.

Auksionda g‘olib chiqqan kompaniya bozor hududini saqlab qolgan holda rekonstruksiya qilish majburiyatini zimmasiga oldi. Loyihaga ko‘ra, maydoni 3000 kv.m dan kam bo‘lmagan zamonaviy ekobozor, 1200 kv.m lik sovutish ombori va kamida 400 ta avtomobilga mo‘ljallangan to‘xtash joyi qurilishi rejalashtirilgan. Qurilish jarayoni bozor faoliyatiga xalal bermasdan amalga oshiriladi.

Rekonstruksiya ishlari boshlanishi bilan qishloq xo‘jaligi bozori boshqa joyga ko‘chiriladi. Qurilish tugagach, bozor aksiyadorlariga 42 sotix maydonda ekobozor, ombor va avtoturargoh qaytarib beriladi. Qolgan hududdan esa investor o‘z xohishiga ko‘ra foydalanish huquqiga ega bo‘ladi.

16-noyabr kuni Yakkasaroy tuman hokimligi tomonidan bozorni rekonstruksiya qilish loyihasi taqdim etilgan edi. Loyiha doirasida yashil maydonlar, to‘rt yulduzli mehmonxona, savdo markazi, zamonaviy infratuzilma va Wi-Fi hududlari tashkil etilishi mo‘ljallangan. Bu loyiha nafaqat infratuzilmani zamonaviylashtirish, balki 150 million dollar miqdoridagi xorijiy sarmoyalarni jalb qilish imkoniyatini ham yaratadi.