Raqamli texnologiyalar vazirligi matbuot xizmati “Daryo”ga bergan ma’lumotiga ko’ra, Shveysariyaning Toshkentdagi elchixonasida O‘zbekiston bilan Shveysariya hamkorlik va taraqqiyot agentligi (EDA) o‘rtasida grant shartnomasi imzolandi. Grant mablag‘lari doirasida, ayniqsa, qishloq aholisi, kam ta’minlangan fuqarolar, yoshlar, ayollar va nogironligi bo‘lgan shaxslarni raqamli texnologiyalar sohasida o‘qitish va ish bilan ta’minlashga alohida e’tibor beriladi.

Bundan tashqari, IT-ta’lim sohasida resurslar agregatorini yaratish rejalashtirilmoqda. Bu platforma o‘zbek talabalariga raqamli ko‘nikmalarini oshirishda yordam beradi. Shuningdek, o‘qituvchilar va yosh mutaxassislarning malakasini oshirishga qaratilgan yangi ta’lim dasturlarini ishlab chiqish ham ko‘zda tutilgan.

Raqamli texnologiyalar vaziri Sherzod Shermatov va EDAning O‘zbekistondagi vakili Andrin Fink o‘rtasida o‘tkazilgan muzokaralarda IT-ta’limni yanada rivojlantirish va yangi hamkorlik loyihalarini amalga oshirish rejalari ham muhokama qilindi.