Elektromobillar va gibrid avtomobillar importi, birinchi marta, benzinli avtomobillardan oshib ketdi. Bu haqda «Spot» nashri, Bojxona qo‘mitasi statistikasiga asoslanib, xabar berdi.

O‘tgan yilning yanvar-dekabr oylarida O‘zbekistonga 80 mingdan ortiq yengil avtomobil olib kelingan bo‘lib, jami import hajmi 1,27 milliard dollarni tashkil etdi. Bu ko‘rsatkich 2023-yilga nisbatan 33,2 foizga kamaygan. Shuningdek, import qilinayotgan avtomobillar soni 7 foizga qisqargan.

Benzinli avtomobillarning importi sezilarli darajada pasayib, 32,98 ming dona (36,3 foizga kamayish) benzinli avtomobil olib kelingan. Import qiymati esa 1,18 milliard dollardan 707,2 million dollargacha (40 foiz) qisqargan. Xorijiy avtomobillarning o‘rtacha narxi esa 6 foizga pasayib, 21,47 ming dollarni tashkil etgan.

Shu bilan birga, «yashil» avtotransport vositalariga bo‘lgan talab oshgan. Masalan, elektromobillar importi 16 mingdan 24 ming donagacha ko‘paygan, ammo ularning qiymati 224,8 million dollarga tushgan, elektromobillarning o‘rtacha narxi esa 3 barobar arzonlashib, 9,33 ming dollarni tashkil etgan. Gibrid avtomobillar importi 42 foizga oshib, 17,48 ming dona yetkazib berilgan. Bu yo‘nalishdagi import qiymati 339,3 million dollarga teng bo‘lgan, gibridlarning o‘rtacha narxi esa 19,41 ming dollarga tushgan.

Natijada, 2024-yilda O‘zbekistonga import qilinayotgan ichki yonuv dvigatelli avtomobillarning ulushi 64,4 foizdan 44,2 foizgacha kamaygan, elektromobillarning ulushi 20 foizdan 32,3 foizgacha o‘sgan. Gibrid avtomobillar ulushi esa 15,3 foizdan 23,4 foizgacha ko‘paygan. Yangi energiya manbalari bilan ishlaydigan avtomobillar birinchi marta benzinli mashinalardan oshib, umumiy import hajmining 55,7 foizini tashkil etgan.

Dizel dvigatelli avtomobillar importi esa sezilarli darajada kamayib, 22 dona import qilingan. Biroq, dizel avtomobillarining import qiymati 45,9 foizga oshib, 5 million dollardan yuqoriga chiqqan.