Yangi oltin quymalar sotuvga chiqarilmoqda
Markaziy bank joriy yilning 17-yanvaridan boshlab aholi uchun yangi oltin quymalar sotuvga chiqarilishini e’lon qildi. Ushbu yangi mahsulotlar 5, 10, 20, 50 grammlik oltin quymalarga qo‘shimcha ravishda, og‘irligi 100 gramm bo‘lgan oltin quymalar bilan to‘ldiriladi.
Oltin quymalar tijorat banklari orqali sotuvga chiqariladi va ular maxsus himoyalangan idishlarda taqdim etiladi.
Markaziy bankning matbuot xabariga ko‘ra, har bir quymaning idishi sertifikat vazifasini bajarib, o‘zining alohida seriya raqami bilan ajralib turadi. Oltin quymalarning narxlari har kuni Markaziy bankning rasmiy veb-saytida milliy valyutada yangilanib boradi.
Quymalar sotuvga chiqarilgandan so‘ng, agar idish shikastlangan yoki texnik talablarga javob bermasa, bu mahsulotlar qaytarib sotib olinadi. Bunday hollarda texnik ekspertiza o‘tkazilib, uning natijalariga asosan to‘lov amalga oshiriladi.
Agar quymaning idishi to‘liq va bus-butun bo‘lsa, ularni O‘zbekiston hududidan tashqariga olib chiqishga ruxsat beriladi.
