Жаҳон банки ўзининг «Глобал иқтисодий истиқболлар» номли йиллик ҳисоботини эълон қилди. Унда жаҳон бўйлаб иқтисодий тенденциялар, алоҳида минтақалар ва уларнинг ривожланиш истиқболлари, шунингдек, мавжуд хавф-хатарлар ҳамда таҳдидлар батафсил таҳлил этилган. Ҳисоботда таъкидланишича, Ўзбекистон 2024 йил якунида ялпи ички маҳсулот (ЯИМ) бўйича 6 фоизлик ўсишни қайд этган.

Жаҳон банки мутахассислари 2025 йилда Ўзбекистон иқтисодиёти ўсишининг 5,8 фоизни ташкил этишини, 2026 йилда эса бу кўрсаткич 5,9 фоизга етиши мумкинлигини таъкидламоқда.

Бундан ташқари, ҳисоботда бутун Европа ва Марказий Осиё минтақаларида 2024 йилда иқтисодий ўсишнинг 3,2 фоизга пасайиши, асосан, Россия ва Туркиядаги иқтисодий ўсишнинг секинлашуви билан боғлиқлиги қайд этилган.

Хомашё нархларининг пасайиши ўзгарган иқтисодий шароитларни бироз енгиллаштирган бўлса-да, иш ҳақи бўйича босим ва хизмат кўрсатиш соҳасидаги меҳнат бозорларидаги таранглик ҳамон юқори даражада сақланиб қолмоқда.

Шунингдек, Марказий Осиё давлатларидаги, хусусан, айниқса, Тожикистонга йўналтирилган пул ўтказмалари ҳажми барқарор сақланган. Бу эса аҳоли истеъмол даражаси барқарорлигини таъминлашга хизмат қилади.