Марказий банк маълумотларига кўра, 2024 йилнинг январь-декабрь ойларида Ўзбекистонда жами 17,09 триллион сўмлик ипотека кредитлари ажратилди. Бу 2023 йилга нисбатан 1,38 фоизга кўпдир. Аммо ипотека олувчилар сони 2023 йилдаги 68,3 мингдан 58,8 минг кишига қисқарди, бу эса 16 фоизга камайишни англатади. Кредитларнинг ўртача миқдори эса 18 фоизга ошиб, 290 миллион сўмни ташкил этди.

Ипотека кредитлари қолдиғи 67,7 триллион сўмни ташкил этиб, бир йил давомида атиги 9,5 триллион сўмга кўпайди. Ипотека кредитлашда давлатнинг улуши бироз камайиб, 56,6 фоиздан 55,8 фоизга тушди. Шу билан бирга, банклар томонидан ажратилган кредитлар ҳажми ортиб, уларнинг кредит беришдаги улуши 34,9 фоизга етди.

Ипотека кредити бўйича энг катта ҳажм Тошкент шаҳрида қайд этилди. Пойтахтда 5,57 триллион сўмлик ипотека кредити ажратилди, бу 11,4 фоизлик ўсишни кўрсатади. Шундай қилиб, Тошкент шаҳри умумий ипотека кредитлаш ҳажмининг учдан бир қисмини ташкил этди.

Иккинчи ўринда Фарғона вилояти ўрин олган бўлиб, у ерда 1,386 триллион сўм ҳажмида ипотека кредити ажратилди (ўсиш 4 фоиз). Шунингдек, Самарқанд, Андижон ва Навоий вилоятлари ҳам бешталикка кирди. Тошкент вилояти эса ипотека кредитлари ҳажми қисқарганлиги сабабли бешликдан чиқди.

Бирламчи бозорда ажратилган кредитлар 66 фоизни (2023 йилга нисбатан 7 фоизга кўпроқ) ташкил этди. Ипотека олувчиларнинг аксарияти (тахминан 36 минг киши) 31 ёшдан 50 ёшгача бўлган эркаклар ҳисобланади. Қолган кредитлар 30 ёшгача бўлган ёшларга ва 50 ёшдан ошган шахсларга берилди.