2026 йилнинг дастлабки олти ойида Ўзбекистонда ипотека кредитлари ҳажми 13,1 трлн сўмни ташкил этди. Бу ҳақда Марказий банк ҳисоботида келтирилган. Кўрсаткич ўтган йилнинг мос даврига (9,5 трлн сўм) нисбатан қарийб 38% га ошган.

Жами 42 575 нафар фуқарога уй-жой харид қилиш учун маблағ ажратилган бўлиб, уларнинг 54%и эркаклар, 46%и эса аёллардир. Ипотека кредитларининг ўртача фоиз ставкаси республика бюджети маблағлари ҳисобидан берилган кредитларда 16,8 фоиз, Ўзбекистон ипотекани қайта молиялаштириш компанияси маблағлари ҳисобидан 21,6%, тижорат банклари маблағлари ҳисобидан эса 20,1% бўлди.

Ёш тоифалари бўйича кредит олувчиларнинг асосий қисмини 31−50 ёшдагилар ташкил этди — 65% ёки 27 516 нафар. 18−30 ёшдагилар улуши 25% (10 903 нафар), 51 ёшдан юқорилар эса 10% (4 156 нафар) бўлди.

Ажратилган кредитларнинг 75%и ёки 9,8 трлн сўми бирламчи уй-жой бозорига йўналтирилиб, ундан 31 995 нафар фуқаро фойдаланди. Қолган 25% ёки 3,3 трлн сўм иккиламчи уй-жой бозорида хонадон харид қилган 10 580 нафар фуқарога ажратилди.

Ҳудудлар кесимида энг кўп ипотека кредити Тошкент шаҳрида берилган — 4,01 трлн сўм. Кейинги ўринларда Андижон (1,11 трлн сўм), Қашқадарё (963 млрд сўм), Фарғона (888 млрд сўм) ва Сурхондарё (834 млрд сўм) вилоятлари қайд этилди. Энг кам ҳажм эса Сирдарё (356 млрд сўм), Жиззах (414 млрд), Бухоро (505 млрд) вилоятлари ҳамда Қорақалпоғистонда (508 млрд) ажратилди.

Банклар орасида Халқ банки 2,19 трлн сўм билан етакчилик қилди. Ундан кейинги ўринларда Агробанк (1,96 трлн сўм), Ўзмиллийбанк (1,67 трлн сўм), Ипотека-банк (1,57 трлн сўм) ҳамда Ўзсаноатқурилишбанк (1,286 трлн сўм) жой олди.