2024 йил давомида Марказий банк томонидан фирибгарлик йўли билан ўзлаштирилган 9,5 млрд сўм миқдоридаги маблағлар блокланди. Бу ҳақда «Spot» хабар берди.

Ўтган йил мобайнида регуляторга ҳуқуқни муҳофаза қилувчи органлардан 2 502 та мурожаат келиб тушди, шундан 460 таси фирибгарлик (фрод) ҳолатларига тааллуқли.

Банк карталари орқали амалга оширилган фирибгарлик амалиётлари, асосан, замонавий ахборот технологияларидан фойдаланилган ҳолда содир этилган.

Марказий банк тақдим этган маълумотларга кўра, фирибгарлар ўзларини банк, тўлов ташкилоти ёки ҳуқуқни муҳофаза қилувчи орган ходими сифатида таништириб, фуқароларни алдаган. Фирибгарлар СИП-технологиялар ёрдамида сохта телефон рақамларидан фуқароларга қўнғироқ қилиб, уларнинг шахсий маълумотларини қўлга киритишга уринган. Бу маълумотлар эса фуқароларнинг ижтимоий тармоқлари ёки зарарли иловалар орқали тўпланган.

Фирибгарликда иштирок этган шахслар фуқароларни ишонтиришга ва уларни муаммо юзасидан зудлик билан ёрдам сўрашга ундаган. Улар картадаги пуллар хавф остида эканлигини айтиб, ўзларининг «ёрдам» таклифларини билдирган.

Марказий банк фирибгарлик ҳолатларининг олдини олиш мақсадида бир қатор антифрод чораларини кўрган. Мобил иловалар орқали амалга ошириладиган фирибгарликларни камайтириш учун телефон қўнғироғи ёки видеоқўнғироқлар пайтида банк мобил иловаларидан фойдаланиш чекланган. Бундан ташқари, янги рўйхатдан ўтган фойдаланувчилар учун мобил иловалар орқали карталарни фаоллаштириш бир соат давомида чеклаб қўйилган.