Статистика агентлиги Ўзбекистонда январь ойи учун истеъмол нархлари индексини (ИНИ) эълон қилди. Унга кўра, ўтган ойда ИНИ 0,72 фоизга ўсган — бу 2023 йилдан буён йилнинг биринчи ойи учун энг юқори кўрсаткичдир. Таққослаш учун, 2024 йилнинг январь ойида нархлар бир ойда 0,64 фоизга ошган.

Қайд этилишича, йиллик инфляция 9,89 фоизни ташкил этган. Ўтган йилга нисбатан 1,31 фоиз пунктга кўтарилган бўлсада, ўсиш суръати 12,19 фоизга етган 2023 йилга нисбатан сезиларли даражада пасайган.

Январь ойида озиқ-овқат маҳсулотлари нархлари 0,8 фоизга ошиб, 2023 йилнинг декабридан бери ойлик кўрсаткичда максимал ўсишни қайд этган. Йиллик озиқ-овқат инфляцияси тезлашди ва 2,6 фоизга (+0,2 фоиз) етган.

Йил бошидан буён энг кўп картошка (+68,1 фоиз), сабзи (+24,1 фоиз), пахта ёғи (+19,5 фоиз) ва кунгабоқар ёғи (+18,1 фоиз), қўй гўшти (+16,2 фоиз) ва мол гўшти (+14,8 фоиз) қимматлашган. Олдинги январга нисбатан бақлажон деярли икки баробар, помидор ва анор учдан бир қисмдан ортиқ, булғор қалампири қарийб 30 фоизга, лимон ва бодринг эса чорак қисмдан ортиқ арзонлашган.

Январь ойида бензин 1,5 фоиз га қимматлашган, йиллик ўсиш эса 3,9 фоизни ташкил этган. Метан 0,1 фоизга (йил давомида +20,9 фоиз), пропан 13,2фоиз га (+8,3 фоиз) арзонлашган.

Пуллик хизматлар нархларининг ойлик ўсиш суръати 2021 йилдан буён энг юқори кўрсаткичга — 1,1 фоизга етган. Январь ойида йиллик кўрсаткич бўйича ўсиш суръати 27 фоизгача тезлашган, бироқ бу ўтган йилга нисбатан сезиларли даражада юқорилигича қолмоқда. Бу биринчи навбатда энергия тарифларининг баҳорда оширилгани билан боғлиқ.

Умумий овқатланиш нархлари бир ойда 0,6 фоизга, меҳмонхоналарда 5,7 фоизга ошган, йиллик ўсиш мос равишда 11,7 фоиз ва 10,7 фоизни ташкил этган. Январь ойида уй-жой ижараси 0,6 фоизга, йиллик кўрсаткичда эса 13,1 фоизга қимматлашган.