«Ўзбекистон – 2030» стратегиясини «Атроф-муҳитни асраш ва «яшил иқтисодиёт» йилида амалга оширишга оид давлат дастури тўғрисида»ги президент фармони қабул қилинди.

Ҳужжатда белгиланишича, Экология, атроф-муҳитни муҳофаза қилиш ва иқлим ўзгариши вазирлиги ва Рақамли технологиялар вазирлиги 2025 йил 1 июнга қадар “Бир миллион яшил оила” умуммиллий ҳаракати доирасида қуйидагиларни назарда тутувчи платформани ишга туширади:

• экологик тамойилларни ўзининг кундалик ҳаётига жорий этишда юқори кўрсаткичларга эришганларга “Экофаол фуқаро” мақомини бериш ҳамда улар учун давлат хизматларидан фойдаланишда 10 фоиз чегирма ва давлат улуши 50 фоиздан юқори бўлган банкларда истеъмол кредитини олишда чегирма тақдим этиш;
• оиланинг барча вояга етган аъзолари “Экофаол фуқаро” мақомини олганда, ушбу оилага “яшил оила” мақомини бериш ҳамда уларга ҳар йили очиқ танлов орқали 14 та электромобиль бериш;
• аҳолисининг ярми “яшил оила” мақомини олган маҳаллаларда “Энг тоза маҳалла” ва “Энг яшил маҳалла” танловларини ўтказиш ва ғолиб бўлган маҳаллалар жамғармасига маҳалла аҳолисининг таклифларини ўрганган ҳолда маҳалланинг ички инфратузилмасини янада яхшилаш тадбирларини молиялаштиришга, хусусан йўлларни таъмирлаш, энерготежамкор ёритиш ускуналарини ўрнатиш, болалар майдончасини қуриш, “яшил боғ” яратиш ва ўриндиқлар ўрнатиш, чиқинди йиғиш майдончаларини қуриш, чиқиндиқутилари ва контейнерларини ўрнатишга 500 миллион сўм ажратиш.

Мазкур банднинг сўзсиз, сифатли ва ўз вақтида ижросини таъминлашга масъуллар этиб тегишинча экология, атроф-муҳитни муҳофаза қилиш ва иқлим ўзгариши вазири А.Абдухакимов, рақамли технологиялар вазири Ш.Шерматов, Қорақалпоғистон Республикаси Вазирлар Кенгаши раиси, вилоятлар ва Тошкент шаҳри ҳокимлари белгиланган.

Кимларга «экофаол фуқаро» мақоми берилади?

Дарахт экадиган, жамоат транспортида ҳаракатланадиган, бир сутка давомида 10 минг ва ундан кўп қадам юрган, ортиқча вазнни камайтирган, чиқинди ташлашни камайтирган, пластикдан фойдаланишни камайтирган ва шахсий автомобилини электромобилга ўзгартирган кишилар «Экофаол фуқаро» ҳисобланади. Шу билан бирга, улар уйига қуёш панели ўрнатиши, уй фасадини энерготежовчи материаллар билан қоплаши, электр ёритишни ҳаркатланиш датчигига ўтказиши ҳамда электр, газ ва сув таъминотини тежашга эришган бўлиши керак. Бундан ташқари, «экофаол фуқаро» бўлиш учун экология соҳасидаги жамоатчилик ишларида фаол иштирок этиш ҳам талаб этилади.