Жорий йил сентябрь ойида Ўзбекистонга умумий қиймати 114,4 млн долларлик 11,5 минг дона электромобиль импорт қилинган. Бу кўрсаткич қиймат жиҳатдан ўтган йил мос даврига қараганда 7,4 баравар, сон бўйича 3,5 баравар кўп.

Божхона қўмитаси маълумотларига кўра, 2025 йилнинг дастлабки ойларида электромобиллар импорти кескин камайганди. Масалан, мазкур турдаги машиналардан январда 613 дона, февралда 942 дона, мартда 1,1 мингта импорт қилинган. Кейинчалик рақамлар апрелда 3 мингта, майда 3,9 мингта, июнда 4,5 мингта, июлда 6,5 мингтага етган. Августга келиб, хориждан электромобиль сотиб олиш улуши сезиларли ўсди ва 8,1 мингтани ташкил этди.

Ўтган ойда қиймати 43,6 млн долларлик 2,4 мингта бензинда ҳаракатланувчи енгил автомобиль импорт қилинган. Таққослаш учун, 2024 йил мос даврида 34,2 млн долларга 1,6 мингта шундай машиналар олиб келинган. Бироқ гибрид автомобиллар импорти кескин қисқарган. Сентябрда хориждан 9 млн долларга 240 дона гибрид автомобиль харид қилинган бўлса, ўтган йилнинг шу давридаги кўрсаткич 24,3 млн долларга 1,4 мингтани ташкил этган.

Умуман олганда, 2025 йил январь–сентябрь ойларида Ўзбекистонга 473 млн долларлик 40,3 минг дона электромобиль импорт қилинган. Таққослаш учун, 2024 йилнинг тўққиз ойида 182 млн долларга 16,2 мингта мазкур турдаги енгил машиналар олиб келинган. Бунда импорт 2,5 баравар ўсгани кўринади.

Божхона қўмитаси маълумотларидан келиб чиқилса, ўтган йили электромобиллар ўртача 4,7 минг доллардан импорт қилинган. Жорий йилдаги нарх эса ўртача 9,9 минг доллардан ошган.

Тўққиз ойлик ҳисобда бензинли автомобиллар импорти улуши камлигича қолмоқда. Яъни январь–сентябрь ойларида чет элдан 13,5 мингта, 2024 йил шу даврида 26,6 мингта бензинда юрувчи машиналар харид қилинган. Тўққиз ойлик даврда гибридлар импорти ҳам кескин камайганини кўриш мумкин — 2,2 мингта (ўтган йил шу даврида 11,4 мингта).