Адлия вазирлиги томонидан 2026 йилда устувор йўналишлар бўйича ислоҳотлар дастурлари ва «Ўзбекистон — 2030» стратегиясини амалга ошириш бўйича давлат дастури тўғрисидаги президент фармони лойиҳаси жамоатчилик муҳокамасига қўйилди. Лойиҳа билан атмосфера ҳавосини зарарлантирмайдиган ва экологик тоза автомобилларни сотиб олиш учун аҳолига қулай шароитлар яратиш режалаштирилмоқда.

Жумладан, 2026 йил 1 мартдан электромобиль сотиб олиш учун фуқароларга имтиёзли шартларда кредитлар ажратилиши мумкин.

Маҳаллий корхоналарда ишлаб чиқарилган электромобилларни сотиб олиш учун — 12% ли, хориждан импорт қилинган электромобиллар учун 16% ли банк кредитлари йўлга қўйилади.

Бунда кредит фоизларининг ошган қисми тижорат банкларига буджет ҳисобидан қоплаб берилади. Топшириқ ижроси учун Ўзавтосаноат ҳамда Божхона қўмитаси масъул бўлади. Биринчи босқичда аҳолига 41 мингта электромобиль хариди учун паст фоизли кредит ажратиш кўзда тутилмоқда.

Шунингдек, лойиҳа билан электромобилларни қувватлаш станциялари сонини ошириш учун рағбатлантириш чоралари белгиланмоқда.

1 майдан бошлаб, бундай шохобчаларда 1 кВт/соат электр энергияси нархининг 300 сўмдан ошган қисми бюджетдан қоплаб берилади.

Электромобилларни зарядлаш станцияларини ташкил қилиш учун тадбиркорларга 10% ли мақсадли кредитлар ажратилади. Маблағлар Тадбиркорликни ривожлантириш компанияси ҳисобидан молиялаштирилади.

Қувватлаш станциялари учун сотиб олинадиган ерлар аукционда бозор қийматидан 2 баравар арзон нархда сотилади. Бунинг натижасида электромобилларни қувватлаш станциялари сони 4 мингтага етказилади.