«Тадбиркорлик фаолияти ва ўзини ўзи банд қилишни давлат томонидан тартибга солишни соддалаштириш чора-тадбирлари тўғрисида»ги президент қарорида белгиланган 103 турдаги меҳнат фаолиятидан бири билан шуғулланса ҳамда ўрнатилган тартибда ўзини ўзи банд қилган шахс сифатида рўйхатдан ўтиб, базавий ҳисоблаш миқдорининг камида бир баробарида ижтимоий солиқ тўловини тўласа, 1 йиллик иш стажи ҳисобланади.

Пенсияга чиқиш учун иш стажи етарли бўлмаган (камида 7 йил) фуқаролар йилига базавий ҳисоблаш миқдорининг камида бир баравари (2025 йил 1 февраль ҳолатига 375 минг сўм) миқдорида ижтимоий солиқ тўлаб, пенсияга чиқиш ҳуқуқига эга бўлишлари мумкин.

Шунингдек, иш стажи пенсияга чиқиш учун талаб этилган иш стажи (эркаклар учун 25 йил, аёллар учун 20 йил)га етмаган ҳолларда ҳам фуқаролар мазкур имкониятдан фойдаланишлари мумкин.

Эслатма: ўзини ўзи банд қилган шахслар ёлланма ишчиларни жалб қила олмаслиги ҳамда иш берувчига эга бўлмаслиги лозим.

Мазкур ижтимоий солиқни тўлаш учун my.gov.uz портали ёки Солиқ мобил иловасидан рўйхатдан ўтиш ҳамда ҳар йили 31 декабрга қадар ижтимоий солиқни тўлаш лозим. Бунда ижтимоий солиқ миқдорини фуқаролар ўз имкониятларидан келиб чиқиб кўпроқ тўлашлари ҳам мумкин. Бу, албатта, келажакда пенсия миқдори юқорироқ бўлишига ҳам таъсир қилади.

Бундан ташқари, пенсия тайинлаш вақти келганда фуқаролардан ўзини ўзи банд қилганлиги тўғрисидаги ҳужжатлар Пенсия жамғармаси бўлимлари томонидан талаб этилмасдан, барча маълумотлар Давлат солиқ қўмитасининг ахборот тизимидан электрон ахборот олиш орқали амалга оширилади.

Маълумот учун, 2025 йил 1 январь ҳолатига Ўзбекистон бўйича 4 471 минг нафардан ортиқ фуқаролар ўзини ўзи банд қилган шахслар сифатида рўйхатга олинган. Шундан 2024 йил давомида ижтимоий солиқ тўловини амалга оширганлар 1 200 минг нафардан ортиқни ташкил қилган. Шунингдек, 2024 йил давомида республика бўйича ўзини ўзи банд қилган ҳолда рўйхатдан ўтган шахслар 2 517 минг нафардан ошган.