Президент фармони билан 3 мартдан ипотека кредитлари учун субсидия олишга аризалар қабули бошланади, дея хабар бермоқда Иқтисодиёт ва молия вазирлиги матбуот хизмати.

Ҳужжат билан 2025 йилга мўлжалланган ипотека субсидияларини тўлашнинг мақсадли кўрсаткичлари тасдиқланди. Ипотека кредитлари бўйича субсидиялар сони ўтган йилга нисбатан 1,5 бараварга ошди — 30 минг нафаргача ариза берувчи ипотека ёрдамини олади.

Ипотека кредитлари бўйича субсидиялар тўлашнинг тасдиқланган мақсадли кўрсаткичлари доирасида аризаларни 3 март куни соат 09:00 дан бошлаб жўнатиш мумкин.

Аризаларни Давлат хизматлари марказлари ёки my.gov.uz орқали топшириш имкони бор. Бунда ариза берувчи хоҳиши билан унинг даромадлари ҳисоб-китобига яқин қариндошларининг ҳам даромадлари киритилиши мумкин.

Хизматдан фойдаланишда ҳеч қандай ҳужжат талаб этилмайди ва аризачи ҳақидаги маълумотлар порталда автоматик равишда шаклланади.

Ариза берувчи ва унинг яқин қариндошларининг (улар аризада кўрсатилган ҳолда) ўртача даромад миқдори:

• Қорақалпоғистон Республикаси ва вилоятларда — меҳнатга ҳақ тўлашнинг энг кам миқдорининг 2,7 бараваридан (3 млн 118 минг 500 сўм) 8 бараваригача (9 млн 240 минг сўм);
• Тошкент шаҳрида — меҳнатга ҳақ тўлашнинг энг кам миқдорининг 2,7 бараваридан (3 млн 118 минг 500 сўм) 9,2 бараваригача (10 млн 626 минг сўмгача) бўлиши зарур.

Маълумот ўрнида, ариза берувчида, шу жумладан, унинг турмуш ўртоғининг номида республиканинг барча ҳудудлари миқёсида мулк ҳуқуқи билан турар жой мавжуд бўлмаслиги лозим.