Марказий банк микро ва кичик бизнесни кредитлаш бўйича банкларга қўйиладиган талабларни камайтиради. Бу ҳақда 25 февраль куни бўлиб ўтган медиа-мулоқотда Кредит ташкилотлари фаолиятини тартибга солиш методологияси департаменти раҳбари Санжар Носиров маълум қилди.

Spot’нинг ёзишича, регулятор йиллик айланмаси мос равишда 1 ва 10 млрд сўмгача бўлган микро ва кичик бизнес субъектлари учун кредитлашни соддалаштиришни режалаштирмоқда.

Кичик тадбиркорлик субъектларига банк регулятив капиталининг 0,2 фоизидан ошмаган ҳолда 15 млрд сўмгача кредитлар ажратишга рухсат берилади.

Микро ва кичик бизнес субъектларининг мажбуриятлари бўйича кредит таваккалчилиги 75 фоиз даражасида белгиланади. Амалда бу фоиз ставкасидан келиб чиқиб, 100, 150 ва 200 фоизни ташкил этади.

Марказий банкнинг қайд этишича, амалдаги тартиб билан кичик бизнес ва ўзини ўзи банд қилганларга ажратилган кредитларга 75 фоизлик таваккачилик коэффициэнтини қўллаш учун кредит суммаси 300 млн сўмдан ошмаслиги керак.

Регулятор тақдимотидан кўриниб турибдики, микро ва кичик бизнесни кредитлашнинг янги тартиби банкларнинг зарур регулятив капиталига бўлган талабларни сезиларли даражада камайтиради. Бу молия институтларига риск-вазнни (риск wэигҳт) камайтириш орқали кўпроқ маблағларни кредитлашга йўналтириш имконини беради.

Масалан, 100 трлн сўм миқдорида кредит ажратилганида банкнинг регулятив капитали камида 9,75 трлн сўмни (амалда — 19,5 трлн сўм), 120 трлн сўм ажратилганда эса 11,7 трлн сўм (23,4 трлн сўм) ни ташкил этиши керак.

Бундан ташқари, Ўзбекистон Марказий банки тижорат банкларига микроқарзлар бериш бўйича талабларни кучайтиришни режалаштирмоқда. Уларнинг умумий кредит портфелидаги улуши автокредитлардаги каби 25% дан ошмаслиги керак.