Йил бошидан буён республиканинг турли ҳудудларида кўчмас мулк савдосининг динамикаси ижобий тенденцияларни намоён қилмоқда. Энг сезиларли ўсиш Жиззах вилоятида кузатилиб, бу ерда савдо ҳажми 44 фоизга, Навоий вилоятида эса 36 фоизга ўшди.

Қайд этилишича, умумий кўчмас мулк бозорининг 28 фоизини эгалловчи пойтахтда, фаоллик 18 фоизга ошган, бу эса шаҳардаги кўчмас мулкка бўлган барқарор қизиқишни тасдиқлайди.

Бир ой ичида республика бўйлаб иккиламчи уй-жой нархлари мўътадил равишда 0,3 фоизга ошган, ўтган йилга нисбатан эса 4,6 фоизлик ўсиш кузатилган.

Иккиламчи бозордаги ўзгаришлар

Энг катта йиллик ўсиш Сурхондарё вилоятида – 11,4 фоиз, Жиззах вилоятида – 10,4 фоиз ва Фарғона вилоятида – 8,4 фоиз қайд этилди.

Январь ойида Тошкент шаҳрида иккиламчи уй-жойнинг ўртача нархи ўзгаришсиз қолди.

Пойтахт туманлари кесимида энг катта нарх пасайиши Сергели туманида – 1,8 фоиз, Юнусобод туманида – 1,7 фоиз ва Мирзо Улуғбек туманида – 1,5 фоиз кузатилди.

Умуман олганда, ўтган йилнинг январь ойига нисбатан Тошкентда 1 метр квадрат учун ўртача нарх мўътадил равишда 2,3 фоизга пасайди.

Уй-жой ижара бозори

Январь ойида Тошкентдаги ижара бозорида фаоллик бироз пасайгани қайд этилди. Пойтахтида 1 квадрат метр жой ижараси ўртача 8,1 фолларни ташкил этмоқда.

Пойтахтнинг Миробод, Шайхонтоҳур ва Яккасарой туманларида ижара нархи юқорилигича қолмоқда. Ушбу туманларда ижара нархи бир квадрат метр учун ўртача 10 долларни ташкил этади.

Шу билан бирга, Тошкент шаҳрида ижара нархи ўтган йилга нисбатан 10,7 фоизга пасайган.

Энг катта пасайиш Чилонзор (-17,4 фоиз), Олмазор (-16,7 фоиз) ва Яшнобод (-14,3 фоиз) туманларида қайд этилган.