Кимлар жисмоний шахслардан олинадиган ер солиғидан озод қилинган?
Солиқ имтиёзларига эга бўлган шахслар солиқ имтиёзларини олиш ҳуқуқини тасдиқловчи ҳужжатларини ер участкаси жойлашган ердаги солиқ органларига мустақил равишда тақдим этиши керак.
Солиқ қўмитаси ер солиғидан озод қилинган жисмоний шахслар тўғрисида маълумот берди. Қайд этилишича, қуйидагилар ер солиғи тўламайди:
- «Ўзбекистон Қаҳрамони», Совет Иттифоқи Қаҳрамони, Меҳнат Қаҳрамони унвонлари, учала даражадаги Шуҳрат ордени билан тақдирланган фуқаролар;
- уруш ногиронлари ва қатнашчилари;
- I ва II гуруҳ ногиронлиги бўлган шахслар;
- ёлғиз пенционерлар;
- боқувчисини йўқотган кўп болали оилалар;
- Чернобил АЭСдаги авария оқибатларини тугатишда иштирок этганлик учун имтиёзлар оладиган фуқаролар.
Уй-жой фондининг кўчмас мулк объектларида умумий қуввати 100 кВтгача бўлган қайта тикланувчи энергия манбаларидан фойдаланувчи шахслар учун солиқ суммаси қайта тикланувчи энергия манбалари қурилмалари ўрнатилган ойдан эътиборан 3 йил давомида, қуёш панеллари қувватидан 25 фоиздан кам бўлмаган қувватга эга электр энергиясини тўплаш тизими мавжуд бўлган қуёш панеллари ўрнатилганда эса мазкур панеллар фойдаланишга топширилган ойдан эътиборан 10 йил давомида базавий ҳисоблаш миқдорининг бир бараваридан ошмайдиган суммага камайтирилади.
Солиқ имтиёзлари якка тартибдаги уй-жой қурилиши, деҳқон хўжалигини юритиш учун берилган ер участкаларига бўлган ҳуқуқларни давлат рўйхатидан ўтказишни амалга оширувчи органда рўйхатдан ўтказган жисмоний шахсларга берилади.
Солиқ имтиёзлари солиқ тўловчининг танлови бўйича фақат битта ер участкасига берилади.
Солиқ имтиёзларига эга бўлган шахслар солиқ имтиёзларини олиш ҳуқуқини тасдиқловчи ҳужжатларини ер участкаси жойлашган ердаги солиқ органларига мустақил равишда тақдим этади.
