2026 йил якунларига кўра Ўзбекистон давлат бюджети даромадлари 439,7 трлн сўмни ташкил этиши кутилмоқда, бу бюджет тўғрисидаги қонун билан тасдиқланган кўрсаткичдан 19% га кўпдир. Бундай тахминлар Иқтисодиёт ва молия вазирлиги томонидан тайёрланган 2027−2029 йилларга мўлжалланган Фискал стратегияда келтирилган.

Вазирлик прогнознинг қайта кўриб чиқилишини солиқ маъмуриятчилиги такомиллашгани, шунингдек, қимматбаҳо металларнинг жаҳон нархлари кутилганидан юқорироқ бўлгани билан изоҳламоқда.

2025 йилнинг кутилаётган ижросига (359,8 трлн сўм) нисбатан буджет даромадлари қарийб 80 трлн сўмга ёки 22,2% га ортади.

Энг юқори ўсиш суръатлари тўғридан-тўғри солиқлардан тушумларда кузатилиб, улар 149,6 трлн сўмни (+2025 йилга нисбатан 27%) ташкил этади. Билвосита солиқлар 131,6 трлн сўмгача (+20,1%), ресурс ва мулк солиқлари 54,5 трлн сўмгача (+21,4%), бошқа даромадлар эса 104 трлн сўмгача (+19,1%) ўсиши кутилмоқда.

2026 йилда бюджет даромадларининг асосий қисмини қуйидагилар таъминлайди:

тўғридан-тўғри солиқлар — 149,6 трлн сўм (2025 йилда кутилаётган 117,8 трлн сўмга нисбатан +27%), шу жумладан:

• фойда солиғи — 96,5 трлн сўм (+33,5%);
• жисмоний шахслардан олинадиган даромад солиғи — 49,8 трлн сўм (+17,5%);
• айланма солиғи — 3,2 трлн сўм (+3,2%);

билвосита солиқлар — 131,6 трлн сўм (2025 йилга нисбатан +20%), жумладан:

• ҚҚС — 93 трлн сўм (+22,4%);
• акциз солиғи — 24,5 трлн сўм (+11,9%);
• божхона божлари — 14,1 трлн сўм (+20,5%);

ресурс ва мулк солиқлари — 54,5 трлн сўм (+21,4%), шу жумладан:

• ер қаъридан фойдаланганлик учун солиқ — 31,5 трлн сўм (+22,1%);
• ер солиғи — 12,5 трлн сўм (+25%);
• мулк солиғи — 9,2 трлн сўм (+15%);
• сув ресурсларидан фойдаланганлик учун солиқ — 1,2 трлн сўм (ўзгаришсиз);
• бошқа даромадлар — 104 трлн сўм (2025 йилга нисбатан +19,5%).

2027 йилда давлат буджети даромадлари 422,3 трлн сўм ёки ЙИМга нисбатан 17,1% миқдорида прогноз қилинмоқда.

Бунда тушумларнинг энг йирик манбалари билвосита солиқлар (146,8 трлн сўм, жами даромадларнинг 34,8%) ва тўғридан-тўғри солиқлар (141,9 трлн сўм, 33,6%) бўлиб қолади. Ресурс ва мулкий тўловлар 52,9 трлн сўмни (12,5%), бошқа ва солиқ бўлмаган даромадлар 80,7 трлн сўмни (19,1%) ташкил этади.

Стратегияга мувофиқ, кейинги йилларда бюджетнинг даромадлар базаси кенгайишда давом этади: 2028 йилда тушумлар 483,1 трлн сўм, 2029 йилда эса 554,1 трлн сўм миқдорида бўлиши прогноз қилинмоқда. Прогноз кутилаётган иқтисодий ўсиш ва солиқ-божхона сиёсатида режалаштирилаётган ўзгаришлар инобатга олинган ҳолда шакллантирилган.