Президент «Ўзбекистон Республикасининг айрим қонун ҳужжатларига ўзгартиш ва қўшимчалар киритиш тўғрисида»ги қонунни имзолади.

Акциядорлик жамиятлари (АЖ) қонун ҳужжатлари талабларини ҳисобга олган ҳолда ўзи чиқарадиган акцияларга оммавий жойлаштириш йўли билан очиқ обуна ўтказишга ҳақли. Бунда АЖ ходимлари акцияларни бирламчи оммавий жойлаштиришда ходимлар акцияларига эгалик қилиш режаси доирасида акцияларни сотиб олишда имтиёзли ҳуқуққа эга бўладилар.

Дивидендлар миқдори АЖ кузатув кенгаши томонидан тавсия этилган миқдордан ортиқ бўлиши мумкин эмас. Бунда давлат улуши 50 фоиз ва ундан ортиқ бўлган корхоналарнинг акциялари фонд бозорида камида 7 йил давомида оммавий жойлаштириш йўли билан жойлаштирилган тақдирда, ушбу корхоналар соф фойдасининг камида 30 фоиз дивидендлар тўлашга йўналтирилади (қонун ҳужжатларида белгиланган чекловлар бундан мустасно).

Акциядорлар умумий йиғилиши томонидан қарор қабул қилингани тўғрисида хабар дивидендлар тўлаш тўғрисидаги ва бошқа муҳим маълумотлар акциядорлар эътиборига ушбу қарор қабул қилинган кундан бошлаб 15 кун ичида СМС ва (ёки) электрон почта орқали ушбу қарор юборилганлиги ва қабул қилинганлиги тўғрисидаги хабарнома қайд этилган ҳолда етказилади.

Бундан буён дивидендларни тўлаш Қимматли қоғозлар марказий депозитарийси ёки инвестициявий-воситачилар орқали акциядорнинг мавжуд банк ҳисобварағига қонун ҳужжатларида белгиланган тартибда автоматик тарзда амалга оширилади. Бунда АЖ акциядордан дивидендлар тўлаш тўғрисидаги аризани талаб қилишга ҳақли эмас.

АЖ томонидан қимматли қоғозлар бозори тўғрисидаги қонун ҳужжатларида назарда тутилган ахборот ва ҳисоботлар йил давомида икки ва ундан ортиқ марта ўз вақтида ошкор этилмаган тақдирда, қимматли қоғозлар бозорини тартибга солиш бўйича ваколатли давлат органи жамиятнинг ижро этувчи органини ўзгартириш тўғрисидаги масалани кўриб чиқиш ҳақида кўрсатма киритишга ҳақли.

Акциялари фонд биржасининг биржа котировкаси варағига киритилган АЖнинг расмий веб-сайтида 5 ва ундан ортиқ фоизга эгалик қилиш тўғрисидаги маълумотларни эълон қилиш талаби чиқариб ташланади.

Эмитент Корпоратив ахборотнинг ягона порталида қуйидаги маълумотларни ошкор этиши шарт:

• қимматли қоғозлар эмиссия рисоласининг матни билан танишиш жойи ва тартиби тўғрисидаги маълумотлар;
• эмитентнинг биринчи чорак, биринчи ярим йиллик ва тўққиз ой якунлари бўйича ҳисоботи;
• эмитент ва аффилланган шахс ўртасида тузилган битим тўғрисидаги ахборот;
• эмитент фаолиятидаги муҳим факт тўғрисидаги хабар.

Шу билан бирга, кўрсатилган маълумотларни ўз расмий веб-сайтида эълон қилиш талаб этилмайди.

Бундан ташқари, расмий веб-сайтга эга бўлиш талаби қимматли қоғозлари фонд биржаси листингига киритилмаган АЖларга нисбатан татбиқ этилмайди, давлат улуши 50 фоиз ва ундан ортиқ бўлган АЖлар бундан мустасно.

Ўзгартиришлар:

• «Акциядорлик жамиятлари ва акциядорларнинг ҳуқуқларини ҳимоя қилиш тўғрисида»ги;
• «Қимматли қоғозлар бозори тўғрисида»ги қонунларга киритилди.

Ҳужжат қонун ҳужжатлари маълумотлари миллий базасида эълон қилинган ва 17.04.2025 йилдан кучга кирди.