Ўзбекистон Иқтисодиёт ва молия вазирлиги ҳузурида «Ўзбекистон қайта суғурта компанияси» ташкил этилади. Тегишли қарор Вазирлар Маҳкамаси томонидан 27 октябрь куни қабул қилинди.

Ҳужжатга мувофиқ, Ўзбекистон миллий қайта суғурта компанияси устав капитали 300 млрд сўмдан кам бўлмаган акциядорлик жамияти шаклида ташкил этилади. Акцияларнинг 50 фоизи Истиқболли лойиҳалар миллий агентлигига (ИЛМА), қолган 50 фоизи хусусий инвесторларга тегишли бўлиши кўзда тутилган.

Миллий қайта суғурта компаниясига хусусий шериклар сифатида қайта суғурталаш соҳасидаги етакчи халқаро компанияларни жалб қилиш белгиланган.

Компанияга хорижий банкларда ҳисобварақлар очиш, улар бўйича тўловларни амалга ошириш, шунингдек, суғурта тўловлари ва суғурта ҳамда инвестициялар билан боғлиқ бошқа операцияларни амалга оширишга ваколати берилади.

Шунингдек, у энг яхши таклифларни танлаб олиш йўли билан (онлайн савдоларсиз) асбоб-ускуналар, техника, алоқа воситалари ва дастурий таъминотни харид қилиш ҳуқуқига эга бўлади.

Қарорга мувофиқ, ИЛМА қайта суғурта компанияси таъсис этилганидан кейин бир ой ичида унинг устав капиталига 5 фоиз миқдорида ҳисса қўшиши, қолган қисмини йил давомида ҳар чоракда тенг улушларда киритиб бориши назарда тутилган. Шунингдек, 2031 йил 1 январгача миллий қайта суғурта компаниясидаги давлат улуши бўйича дивидендлар ҳисоблаб чиқариш тартибида тўлиқ ИЛМА ҳисобварағига ўтказилади.

Миллий қайта суғурта компаниясини ташкил этиш тўғрисидаги президент қарори шу йилнинг май ойида қабул қилганди. Унинг вазифалари қаторига:

• тўғридан-тўғри ва портфель инвестицияларни қайта суғурталаш орқали ҳимоя қилиш;
• хорижий ва маҳаллий инвесторлар томонидан лойиҳаларни амалга оширишда хатарларни суғурталаш;
• қайта суғурталаш соҳасидаги халқаро ҳамкорлик киради.