Халқаро валюта жамғармаси Ўзбекистоннинг молиявий барқарорлигига микрокредитлашнинг тез суръатлар билан ўсиши хавф туғдираётганини аниқлади. Бу ҳақда фонд миссиясининг 2025 йилги маслаҳатлашувлар якунлари бўйича якуний баёнотида маълум қилинган.

ХВЖ Марказий банкка молиявий барқарорлик учун юзага келаётган хатарларни диққат билан кузатиб бориш ва уларни бартараф этишга тайёр туришни давом эттиришни тавсия қилди.

Шу муносабат билан, регуляторнинг сўнгги макропруденциал чора-тадбирлари аҳолини кредитлаш ўсишини секинлаштирди ва банкларни қарз олувчиларнинг кредит қобилиятига кўпроқ эътибор беришга ундади.

«Шундай бўлсада, микрокредитлаш сегменти тез суръатлар билан ўсиб бормоқда, чунки микроқарзлар ва микрокредитлар енгилроқ шартларда берилмоқда. Молиявий хизматлардан фойдаланиш имкониятларини кенгайтиришга қаратилган саъй-ҳаракатлар ижобий баҳоланишга лойиқ бўлсада, улар банкларнинг кредит лаёқатини тўғри баҳолаш имкониятларига салбий таъсир кўрсатмаслигига ишонч ҳосил қилиш лозим, чунки бу молиявий барқарорлик учун хатарларни кучайтириши мумкин» — дея таъкидланади миссия баёнотида.

Марказий банк бу хатарларни чеклаш мақсадида рискга йўналтирилган назоратни кучайтириши ҳамда зарур ҳолларда капиталга қўшимча талаблар ёки бошқа мажбурий макропруденциал меъёрларни жорий этиши керак.

Регулятор, шунингдек, ҳимояланмаган корпоратив қарз олувчиларни валютада кредитлаш, расмий даромадга эга бўлмаган жисмоний шахсларни ва тўловга қобилиятсизлик ёки ликвидсизлик хавфи юқори бўлган корпорацияларни кредитлаш билан боғлиқ хатарларни бартараф этиши керак. Имтиёзли ва кўрсатма асосидаги кредитлашдан воз кечиш асосий вазифалардан бири бўлиб қолмоқда.