Жорий йилнинг биринчи чорагида Ўзбекистонда аҳолига кредит ажратиш кескин ошди. Бу ҳақда Марказий банкнинг пул-кредит сиёсати бўйича шарҳида келтирилган.

Январь март ойларида фуқароларга жами 34,9 трлн сўмлик кредитлар ажратилган. Бу 2024 йилнинг мос даврига нисбатан 74% га кўпдир. Марказий банк буни аҳоли даромадлари ўсиши фонида уларнинг ипотека кредити, микроқарз ва микрокредитларга бўлган талабининг ортиши билан изоҳлади.

Фуқароларга ажратилган кредитларнинг ярмидан кўпи — 53,6%и микроқарзларга тўғри келди. Иккинчи ўринда 15,6% билан микрокредитлар турибди. Натижада, микрокредитлашнинг умумий улуши 69% дан ошди. Кучли бешликда, шунингдек ипотека кредитлари (12,8%), автокредитлар (10%) ва қолган (8%) кредитлар ҳам бор.

Бундан ташқари, дастлабки уч ойда микроқарз (18,7 трлн сўм) ва микрокредитлар (5,5 трлн сўм) мос равишда 2,3 ва 1,9 баробарга, кредит карталари орқали ажратилган маблағлар (2,4 трлн сўм) 3,3 баробарга ҳамда ипотека кредитлари (4,5 трлн сўм) 26,3% гача ўсган. Бироқ, бу даврда автокредитлаш 17,6% гача камайиб, 3,5 трлн сўмни ташкил этди.

«Аҳолига ажратилган кредитлар қолдиғининг жадал суръатларда ўсиб бориши келгусида уларнинг молиявий барқарорлигига салбий таъсир кўрсатиши мумкин», — дейилади хабарда.

Марказий банк банкларга микроқарзлар бериш бўйича талабларни кучайтирмоқда. Бунда микроқарзлар ва кредит карталарининг кредит портфелидаги улуши 25%дан ошмаслиги керак. Регулятор банкларга 2029 йилгача муҳлат берди.