Солиқ қўмитаси раиси Шерзод Кудбиев ҳисобга олиш ҳуқуқидан воз кечиш шарти билан хизмат кўрсатиш соҳаси учун қўшилган қиймат солиғи ставкасини пасайтириш имкониятини истисно этмади. Бу ҳақда у 5 июль куни Савдо-саноат палатаси томонидан меҳмонхона бизнеси ва аудиторлик компаниялари вакиллари билан ташкил этилган очиқ мулоқотда айтиб ўтди.

«Солиқлар фақатгина фискал функция ёки даромадларни йиғиш эмас. Уларнинг вазифаларидан бири барчамизнинг иш ҳақини тўғри тўлашимизни таъминлашдир. Фойда ёки дивиденд солиғи ва бу орқали нақд пул олиш ва маош орқали нақд пул олиш деярли бир хил нарса бўлиб қолди», — деди у.

Қудбиевнинг таъкидлашича, тушунарли ва шаффоф қоидалар барчани тўғри ишлашга мажбур қилади. Шунингдек, у ҳисобга олиш ҳуқуқидан воз кечган ҳолда хизматлар соҳаси учун ҚҚС ставкасини пасайтириш имкониятидан сўз очди.

«Масалан, сиз хизмат кўрсатиш соҳаси корхоналари сифатида 12 фоиз ҚҚС тўлайсиз, аммо амалда бу тўловлар ҳисобга олинмайди. Балки сиз бу ҳисобдан воз кечарсиз ва биз ҚҚС ставкасини мутаносиб равишда пасайтирамиз? Лекин тизим бир хиллигича қолади. Яъни ҚҚС тўловчиси бор, фақат унинг ставкаси бошқача. Балки мен ҳаммасини фараз қилиб айтаётгандирман. Лекин фойда солиғи қолади, маъмуриятчилик бир хиллигича қолади. Ва биз ҳаммамиз бир хил шароитда ишлаймиз», — деди у.

Унинг фикрича, бундай тартиб хатолар хавфини камайтиради ва маъмуриятчиликни осонлаштиради. Тизимлар кўп бўлса, хатолар ҳам кўп бўлади, — деди Кудбиев.