2025 йилнинг биринчи ярмида аҳоли томонидан хорижий валютани сотиб олиш ва сотиш ҳажмлари ўртасидаги фарқ сезиларли даражада ошди, дейилади Марказий банк ҳисоботида.

2025 йил январь июнь ойларида банклар ва жисмоний шахслар ўртасидаги хорижий валюта олди-сотди операциялари умумий ҳажми 14,5 млрд долларни ташкил этди. Бу кўрсаткич 2024 йилнинг шу даврига нисбатан 24 фоизга ошган.

Банклар аҳолидан 9,1 млрд долларлик валютани сотиб олди (27 фоизга ўсиш). Аҳолига сотилган хорижий валюта ҳажми эса 18 фоизга ошиб, 5,39 млрд долларни ташкил этди.

Банклар томонидан жисмоний шахслардан сотиб олинган чет эл валютаси ҳажми уларга сотилган валюта ҳажмига нисбатан 3,7 млрд долларга кўп бўлди. Бу ўз навбатида, ички валюта бозорида қўшимча таклиф манбаи бўлиб хизмат қилмоқда.

Валюта олди-сотди операцияларининг 58 фоизи ёки 8,4 млрд доллари (2024 йил И ярим йилликка нисбатан ўсиш 16 фоиз) валюта айирбошлаш шохобчалари, 41 фоизи ёки 5,9 млрд доллари (ўсиш 36 фоиз) масофавий хизмат кўрсатиш (онлине) ва қолган 252 млн доллари (ўсиш 32 фоиз) 24/7 режимда фаолият кўрсатувчи банкоматлар орқали амал оширилган.

Эслатиб ўтамиз, 2024 йилда жисмоний шахслар банкларга 16,1 млрд доллар миқдоридаги (2023 йилга нисбатан 31 фоизга кўп) чет эл валютасини сотган эди. Шунингдек, йил давомида аҳоли 9,4 млрд доллар миқдорида валюта сотиб олган (+3 фоиз). Мамлакат бўйлаб валюта айирбошлаш шохобчалари сони йил давомида 20 фоизга кўпайган эди.