Олий Мажлис Қонунчилик палатаси «Банк тизимини ислоҳ қилиш ва банкларни трансформация қилиш борасидаги ишлар» юзасидан Марказий банк раиси Тимур Ишметовга парламент сўрови юборди.

2020−2025 йилларга мўлжалланган банк тизимини ислоҳ қилиш стратегияси қабул қилинган бўлсада, таҳлиллар давлат улуши юқори даражада сақланиб қолаётганини ва хусусий банклар улуши стратегик кўрсаткичлардан пастлигича қолаётганини кўрсатмоқда.

Парламент сўрови муҳокамасида депутатлар банкларни трансформация қилишдаги бундай ҳолатлар тадбиркорлик субъектлари ва аҳолининг замонавий банк хизматларига бўлган талабларини қондиришга салбий таъсир кўрсатаётганини таъкидладилар.

Бугунги кунда янги ташкил этилган кредит ташкилотларининг асосий қисми Тошкент шаҳри ва вилоят марказларида жойлашганлиги сабабли, қишлоқ ҳудудларида уларнинг хизматларидан фойдаланиш имконияти чекланган.

Бу эса банк ва молиявий хизматларнинг оммабоплигини ошириш ҳамда бундай хизматларнинг барча аҳоли пунктларида кўрсатилишини таъминлаш бўйича қўшимча чоралар кўрилишини талаб этмоқда.

Шунингдек, аҳолидан келиб тушаётган мурожаатлар банк карталари орқали фирибгарликларнинг олдини олишга қаратилган чоралар, хусусан банк тизимида замонавий ҳимоя тизимларини жорий этиш ҳамда ахборот хавфсизлигини лозим даражада таъминлаш борасида ҳам тезкор чора-тадбирлар кўриш зарурлигини кўрсатмоқда.

Бундан ташқари, аҳолидан тушаётган мурожаатлар банк карталари орқали фирибгарликларнинг олдини олиш, ҳимоя тизимларини кучайтириш ва ахборот хавфсизлигини таъминлаш зарурлигини кўрсатмоқда.

Шу асосда банк хизматларининг оммабоплигини ошириш ва секторни чуқур трансформация қилиш бўйича Марказий банк раиси Тимур Ишметовга ушбу масала юзасидан парламент сўрови юборилиши тўғрисида қарор қабул қилинди.