Ўзбекистонга пул ўтказмалари II чоракда 21 фоизга ўсди
Болтиқ давлатлари, Европа ва бошқа минтақалардан ўтказмалар ҳажми ўсиш суръати қолган минтақаларга нисбатан юқорироқ сақланиб қолмоқда. Бунда, айниқса Болтиқ давлатларидан пул ўтказмаларининг сезиларли ошиши кузатилиб, ўтган йилнинг мос даврига нисбатан 65,6 фоизга ўсди.
2025 йилнинг II чорагида меҳнат муҳожирлари томонидан Ўзбекистонга 4,8 млрд доллар миқдорида пул ўтказмалари амалга оширилиб, ўтган йилнинг мос даврига нисбатан 21,4 фоизга ўсиш қайд этилди. Бу Марказий банк томонидан эълон қилинган меҳнат бозори шарҳида келтирилади.
2024 йилнинг II чорагида пул ўтказмаларидаги ўсиш 38,6 фоиз бўлганди.
“Жорий динамиканинг шаклланиши асосан меҳнат муҳожирларини қабул қилувчи мамлакатларда валюта курсларининг нисбатан барқарорлиги, иш ҳақининг ошиши ва иқтисодий фаолликнинг юқори суръатлари билан боғлиқ”, – дейилади релизда.
Болтиқ давлатлари, Европа ва бошқа минтақалардан ўтказмалар ҳажми ўсиш суръати қолган минтақаларга нисбатан юқорироқ сақланиб қолмоқда. Бунда, айниқса Болтиқ давлатларидан пул ўтказмаларининг сезиларли ошиши кузатилиб, ўтган йилнинг мос даврига нисбатан 65,6 фоизга ўсди.
Шунингдек, мазкур даврда АҚШ, Россия ва Европадан жўнатилган пул ўтказмалари ўсишининг пасайиши (мос равишда 10,3, 23,7 ва 26,9 фоизгача) кузатилган бўлса, Осиёдан ўтказмаларнинг барқарорлашуви сақланиб қолди.
Шарҳда келтирилишича, ташқи бозорда, хусусан Россия, Европа ва Болтиқ давлатларида кузатилаётган сўнгги ўзгаришлар ҳамда меҳнат муҳожирларига бўлган талабнинг ўсиши пул ўтказмаларидаги жорий динамиканинг шаклланишида муҳим аҳамият касб этган. Бу, ўз навбатида, меҳнат муҳожирлари оқими йўналишлари босқичма-босқич кенгаяётганидан далолат беради.
Аввалроқ Марказий банкнинг ушбу ҳисоботига таяниб Ўзбекистонда реал иш ҳақи ўсиши минтақа давлатларига нисбатан ортда қолнганди. 2025 йилнинг апрел-июн ойларида Ўзбекистонда иш ҳақининг реал ўсиш суръати 7,3 фоизни ташкил этди – бу кўрсаткич Марказий Осиё давлатларида 9,8 фоиз, айрим Кавказ давлатларини ҳисобга олганда эса 9,1 фоиз бўлган.
Эслатиб ўтамиз, Жаҳон банкининг апрел ойидаги ҳисоботида 2024 йилда Россиядан шахсий пул ўтказмалари ҳисобига Ўзбекистонга пул ўтказмалари оқими 30 фоизга ўсиб, қарийб 15 миллиард долларга етгани келтирилган эди. Жаҳон банки агар пул ўтказмалари бўлмаганда, Ўзбекистондаги камбағаллик даражаси 2 баравар юқори бўлиши мумкинлигини ҳисоблаб чиққан. Марказий Осиё ва Ғарбий Болқондаги аксарият мамлакатларда пул ўтказмалари ялпи ички маҳсулотнинг ўндан биридан кўпроғини ташкил этиб, уй хўжаликларига катта ёрдам беради.
