Ўзбекистонда дистрибютор ва дилерларга илгари фойдаланишда бўлган автомобилларни алмаштиришга рухсат берилади. Бу Вазирлар Маҳкамасининг 22 августдаги қарорида кўзда тутилган.

Ҳужжат билан Ўзбекистон ҳукуматининг айрим қарорларига автомототранспорт воситалари билан боғлиқ савдо тартибини такомиллаштиришга қаратилган ўзгартириш ва қўшимчалар киритилмоқда.

Хусусан, Вазирлар Маҳкамасининг 2006 йил 7 мартдаги «Автомототранспорт воситалари билан боғлиқ битимларни расмийлаштириш тартиби тўғрисида»ги низомда «ихтисослаштирилган савдо корхоналари» сўзлари «дистрибютор ёки дилер ташкилотлари» сўзлари билан алмаштирилмоқда.

Қарорга мувофиқ, дистрибютор ташкилоти — Ўзбекистон ҳудудида янги автомототранспорт воситаларини реализация қилиш бўйича ишлаб чиқарувчи билан тегишли дистрибюторлик келишувига эга юридик шахс. Дилер ташкилоти эса Ўзбекистон ҳудудида янги автомототранспорт воситаларини реализация қилиш бўйича дистрибютор ташкилоти ёки ишлаб чиқарувчи билан тегишли дилерлик келишувига эга юридик шахсдир.

Бундан ташқари, қарорда янги — Trade-Up тушунчаси бўлиб, у илгари фойдаланишда бўлган автомототранспорт воситасини илгари фойдаланишда бўлган автомототранспорт воситасига нархларидаги фарқни тўлаган (нархларидаги фарқни олган) ҳолда алмаштиришни кўзда тутади.

Низомда шу пайтгача фақат Trade-In механизми тилга олинган бўлиб, у илгари фойдаланишда бўлган автомототранспорт воситасини янги автомототранспорт воситасига нархларидаги фарқни тўлаган (нархларидаги фарқни олган) ҳолда алмаштиришни англатади.

Эслатиб ўтамиз, ИИВ Жамоат хавфсизлиги бошқармаси Йўл ҳаракати хавфсизлиги хизмати бошлиғи Шерзод Иброҳимов 9 июль куни президент билан бўлиб ўтган учрашувдан сўнг эскирган автомашиналарни босқичма-босқич фойдаланишдан чиқариш бўйича режалар ҳақида гапирган эди. У гап 40−50 йиллик машиналар ҳақида бораётганини, бу борада Сенат ва Олий Мажлис вакиллари билан ҳамкорликда иш олиб борилаётганини айтганди. Депутат Алишер Қодиров ташаббусни қўллаб-қувватлаб, эксплуатация йили чегарасини 25−30 га туширишни таклиф қилди.