Ўзбекистон Марказий банки Бошқарувининг жорий йил 27 августдаги тегишли қарори билан Қозоғистоннинг Евроосиё банкидан банк фаолиятини амалга ошириш ҳуқуқини берувчи лицензияси чақириб олинди. Бу ҳақда регулятор матбуот хизмати хабар бермоқда.

Бунга банк томонидан устав капитали миқдори қонунчиликда белгиланган энг кам талабларга мувофиқлаштирилмаганлиги ҳамда банклар ва банк фаолияти тўғрисидаги бошқа талаблар бажарилмаганлиги сабаб бўлган.

«Ўзбекистон Республикасининг Марказий банки тўғрисида»ги, «Банклар ва банк фаолияти тўғрисида»ги қонунлар ва бошқа қонунчилик ҳужжатларига асосан, банкни мажбурий тугатиш ҳамда тугатиш комиссиясини тайинлаш тўғрисида қарор қабул қилинди.

2023 йилнинг апрель ойида президент банклар устав капиталининг энг кам миқдорини босқичма-босқич ошириш тўғрисидаги қонунни имзолади. Ўша йилнинг центабридан бу 200 млрд сўмни, 2025 йилдан эса 500 млрд сўмни ташкил этиши керак.

2022 йилнинг декабрида Қозоғистон банки Ўзбекистонда шўба корхонасини очишни режалаштираётгани маълум бўлганди. 2023 йилнинг майида Марказий банкнинг собиқ раиси Мамаризо Нурмуратов Евроосиё банки Ўзбекистонда ўз офисини очиш учун дастлабки рухсатни олганини маълум қилганди. Шунингдек, 2024 йилнинг 12 январида Марказий банк томонидан Қозоғистон кредит ташкилотига банк фаолиятини амалга ошириш ҳуқуқини берувчи лицензия берилган эди.

Марказий банк реестрига кўра, ҳозирда Ўзбекистонда фаолият юритаётган хорижий банк ваколатхоналари сони 8 тани ташкил этади. Улардан иккитаси Жанубий Корея, яна иккитаси Германия банкларига тегишли. АҚШ, Россия ва Хитой банкларида яна биттадан офис мавжуд.