Жорий йил 1 сентябрь ҳолатига кўра, Ўзбекистон олтин-валюта захиралари қиймати биринчи марта 50,1 млрд долларга етди. Бу ҳақда Марказий банк эълон қилган статистикада маълумот берилган.

Жорий ой бошида мамлакат захирасида 11,8 млн унция (334,5 тонна) олтин борлиги қайд этилган. Унинг қиймати 40 млрд доллардан ортиқни ташкил этган. Таққослаш учун, август ойи бошида бу рақам 38,7 млрд доллар эди (331,6 тонна). Бир ой давомида республика олтин захираси қолдиғи қарийб 1,4 миллиард долларга ошган.

Сентябрь аввалида хорижий валютадаги захира активлари 9,44 млрд долларни ташкил этган. Бу рақам бир ой олдингидан 49,3 млн долларга кам.

Захиралар қиймати олтин нархи кескин қимматлашгани фонида ўсиб бормоқда. Масалан, 2024 йил 1 сентябрда (1 йил илгари) республика захирасида 12 млн унция (340,1 тонна) олтин бўлган (12 ойда 5,6 тонна камайган). Қимматбаҳо металл қиймати эса 30,4 млрд долларни ташкил этган. Яъни мамлакатда олтин миқдори эмас, қиймати сезиларли ўсиш трендида.

Урушлар, давлатлар ўртасидаги низолар, умуман олганда глобал иқтисодий-сиёсий ноаниқликлар фонида олтин нархи кескин кўтарилиб бормоқда. Мисол учун, 8 сентябрь ҳолатига кўра, 1 унция олтин нархи дунёда 3 минг 655 доллардан ошди. Бундай юқори қиймат нафақат аввалги ойларда, балки тарихда бўлмаган.

Ўзбекистон нарх қимматлашгани сари олтин сотуви бўйича рекордларни ҳам янгиламоқда. Республика жорий йил январь июль ойларида қарийб 7,7 млрд долларлик олтин экспорт қилди. Мазкур кўрсаткич ўтган йил мос давридагига қараганда 83,7 фоизга кўп. Олтин сотуви мамлакат етти ойлик жами экспортининг 37,7 фоизини ташкил этган.

Маълумот учун, Ўзбекистонда 2025 йил И ярмида 56,7 тонна олтин қазиб олинган. Бу рақам ўтган йил мос давридагига қараганда 3,8 фоизга юқори.