Ўзбекистоннинг олтин-валюта захиралари май ойида 307,3 млн долларга камайиб, 1 июнь ҳолатига 70,58 млрд долларни ташкил этди. Бу Марказий банк маълумотларидан келиб чиқади.

Март ойида захиралар ҳажми сезиларли — 68,99 млрд долларгача (-10,5 фоиз) қисқариб, апрелда асосан хорижий валютадаги активлар ҳажми ортиши ҳисобига ўсиш бироз тикланган ва захиралар ҳажми 70,9 млрд долларни ташкил этган эди.

Май ойида халқаро захираларда хорижий валютадаги активлар ҳажми 1,5 млрд долларга қисқарди.

Захиралардаги олтиннинг қиймати 61,59 млрд доллардан 61,44 млрд долларгача (-1,56 млрд) камайди. Марказий банкнинг изоҳлашича, олтин қийматининг тушиши ой давомида олтин нархининг 4625,80 доллардан 4516,85 долларгача пасайиши ҳисобига юзага келган. Айни пайтда захиралардаги олтиннинг физик ҳажми 13,6 млн (+0,3 млн) трой унсиягача ортди.

Халқаро стандартларга кўра, Ўзбекистон халқаро захираларида олтиннинг улуши жуда юқорилигича қолмоқда. Марказий банк аввалроқ захиралар таркибида олтин улушининг юқорилиги активларни бошқаришдаги консерватив ёндашувни акс эттиришини таъкидлаган эди. Шу билан бирга, регулятор қимматбаҳо металлар нархининг ўзгарувчанлиги билан боғлиқ хатарларни ҳисобга олган ҳолда, портфелни босқичма-босқич диверсификация қилишни бошлади.

Халқаро захиралар макроиқтисодий барқарорликнинг асосий воситаси бўлиб қолмоқда. Улар миллий валюта курсининг тебранишларини юмшатиш, ташқи мажбуриятларга хизмат кўрсатиш, инқирозли вазиятларда импортни молиялаштириш ҳамда иқтисодиётни ташқи шоклардан — хомашё нархларининг тушишидан тортиб, молия бозорларидаги турбулентликкача бўлган хавфлардан ҳимоя қилиш имконини беради.