Январь—август ойларида Ўзбекистонга хориждан 12 млрд доллардан ортиқ пул ўтказмалари амалга оширилди. Бу ҳақда 11 сентябрда ўтказилган Марказий банк бошқаруви йиғилиши якунлари юзасидан ташкил этилган матбуот анжуманида маълум қилинди.

Йил бошидан буён амалга оширилган трансчегаравий пул ўтказмалари ҳажми 2024 йилнинг шу даврига нисбатан 23 фоизга ўсган.

Марказий банк маълумотларига кўра, пул ўтказмалари ҳажми март ойидан бошлаб ўсиш тенденциясини намоён қилган, август ойида эса бироз секинлашган. Хусусан, июль ойида трансфертлар миқдори қарийб 2 млрд долларга етган бўлса (2024 йил июлига нисбатан 10,5 фоиз ўсиш), август ойида 1,9 млрд долларни (19,9 фоиз ўсиш) ташкил этган.

Бундан ташқари, аҳоли томонидан амалга оширилган валюта олди-сотдисида 5,6 млрд долларлик ижобий фарқ қайд этилган: йил бошидан буён аҳоли сотиб олганидан 5,6 млрд долларга кўпроқ валюта сотган. Олди-сотди бўйича ижобий фарқ 2024 йилнинг январь август ойларига нисбатан 40 фоизга ошган.

Аввалроқ Марказий банк биринчи яримйилликда Ўзбекистонга трансчегаравий ўтказмалар ҳажми ўтган йилнинг шу даврига нисбатан 27% ошиб, 8,2 млрд долларни ташкил этганини хабар қилганди.