Шавкат Мирзиёев Ўзбекистоннинг Евроосиё тараққиёт банкини таъсис этиш тўғрисидаги битимга қўшилиши муносабати билан банк акцияларини харид қилиш жадвалини тасдиқлади. Президент қарори Lex.uz сайтида эълон қилинди.

Қарорга мувофиқ, Ўзбекистон Инвестициялар, саноат ва савдо вазирлиги (ИССВ) банкнинг номинал қиймати 1000 доллар бўлган 777 777 та акциясини сотиб олади. Шундан 168 411 та акцияга (сотиб олинаётган акцияларнинг 21,7 фоизи) ҳақ тўланади, қолган қимматбаҳо қоғозлар учун тўлов талаб қилинганда амалга оширилиши назарда тутилган.

Тўловнинг умумий миқдори 168,411 млн долларни ташкил этади. Дастлабки 10 млн долларни 23-центабргача (қарор кучга киргандан бир ҳафта ўтгач), қолган қисмини эса 2026−2027 йиллар давомида тенг улушларда 79 205 500 доллардан тўлаб бориш топширилган.

Шунингдек, ЕОТБ билан ҳамкорлик доирасидаги муносабатлар бўйича ваколатли орган этиб ИССВ белгиланди. Бош вазир ўринбосари Жамшид Хўжаев ҳамкорлик бўйича ваколатли вакил, инвестициялар, саноат ва савдо вазири ўринбосари Хуррам Тешабоев эса унинг ўринбосари этиб тайинланди.

Апрель ойида президент Ўзбекистоннинг ЕОТБни таъсис этиш тўғрисидаги битимга қўшилишини маъқулловчи қонунни имзолаганди. Унга кўра, банк «халқаро шартномалар, халқаро ҳуқуқ, банк фаолияти тамойиллари ва меъёрларига мувофиқ» фаолият юритади.

ЭОТБ иқтисодиётдаги вазият, молия бозоридаги ҳолат, инвестиция имкониятлари, пул-кредит ва валюта муносабатлари, банк соҳасидаги қонунчилик ва валютани тартибга солиш тўғрисидаги маълумотларни тўплайди, тизимлаштиради ва таҳлил қилади.

Ўзбекистоннинг 2025 йилда ЕОТБга аъзо бўлиш режалари ҳақида Шавкат Мирзиёев 26 декабрь куни Россиянинг Санкт Петербург шаҳрида ўтган Олий Евросиё иқтисодий кенгашининг йиғилишида маълум қилганди.

ЕОТБ ҳақида

Евросиё тараққиёт банки (ЕОТБ) халқаро молия ташкилоти бўлиб, унга аъзо давлатларнинг иқтисодий ўсишига кўмаклашиш, уларнинг савдо-иқтисодий алоқаларини кенгайтириш ва инвестиция фаолияти орқали Евросиё ҳудудида интеграция жараёнларини ривожлантиришга хизмат қилади.

ЕОТБ 2006 йилда Россия ва Қозоғистон томонидан ташкил этилган бўлиб, 2009 йилда Арманистон ва Тожикистон, 2010 йилда Беларусь, 2011 йилда Қирғизистон ушбу банкка аъзо бўлган. Банкнинг устав капитали 7 млрд долларни ташкил этади.

ЕОТБнинг асосий стратегик мақсадлари:

• кучли интеграция эффектига эга лойиҳаларни ва миллий ривожланиш лойиҳаларини молиялаштириш;
• янги молиявий маҳсулотлар ва воситаларни жорий этиш;
• саноат ишлаб чиқариши соҳасидаги лойиҳаларни қўллаб-қувватлаш;
• банкка аъзо мамлакатларда ДХШ асосидаги ташаббусларни илгари суриш;
• иштирокчи мамлакатларга қўшимча сармояларни жалб қилиш учун ҳамкорликни ривожлантириш ҳисобланади.