Ҳукумат қарори билан 1 октябрдан Тошкент шаҳри ва Тошкент вилоятининг Янгийўл туманида қўшилган қиймат солиғини (ҚҚС) автоматик равишда қайтариш тизими синов тариқасида ишга туширилиши белгиланган.

Ижтимоий ҳимоя ягона реестри ёки Камбағал оилалар реестрига киритилган фуқаролар ойига БҲМнинг 10 бараваригача — 4,12 млн сўм миқдорда қайтим олиши мумкин. Ҳар бир харид учун энг кўп қайтариладиган сумма 494,4 минг сўмни ташкил этади.

ҚҚС гўшт (қўй, мол, парранда), тухум, ўсимлик мойи, ун, шакар, дори-дармонлар ва тиббий хизматлар учун қайтарилади. Кэшбек Иқтисодиёт ва молия вазирлиги орқали республика бюджети ҳисобидан молиялаштирилади.

Маблағлар тўғридан-тўғри ижтимоий карталарга ўтказилади, QR-код сканерлаш талаб этилмайди. Илгари фақат харид суммасининг 1% и қайтарилган бўлса, эндиликда тўланган солиқнинг тўлиқ миқдори қайтарилади.

Солиқ қўмитаси қуйидаги ҳолларда солиқ суммасини тўлиқ ёки қисман қайтаришни рад этади:

• кэшбек қайтаришга қаратилган ҳуқуқбузарлик аниқланса;
• солиқ суммаси қайтариладиган товарлар рўйхатига кирмаса ёки товар сони белгиланган чегарадан ошса;
• харид ҳақиқатан ҳам мазкур шахс томонидан амалга оширилгани шубҳа остида бўлса;
• чекдаги идентификация коди ёки штрих-коди нотўғри бўлса ёки маълумотлар базасида мавжуд бўлмаса.

Агар харид бўйича ҚҚС аввал қайтарилган бўлса, тадбиркор чекни ўзгартириши мумкин эмас. Фақат солиқ органининг розилиги билан қайта ҳисоблашга рухсат берилади.