Президент ишлаб чиқариш корхоналари фаолиятини барқарорлаштириш ҳамда тадбиркорлар масалаларини ҳал этиш юзасидан тақдимот билан танишган эди. Унда айрим товар ва хизматлар учун тўловларни нақд пульсиз қабул қилиш амалиёти кенгайиб бораётгани учун банк инфратузилмаси, комиссиялар ва истеъмолчиларга қайтариладиган кешбек тизимини такомиллаштириш зарурлиги қайд этилди. Аҳолига ўз банк карталари ўртасидаги пул ўтказмаларини комиссиясиз амалга ошириш, нақдсиз тўловларнинг қулай шаклларини кўпайтириш таклиф қилинди.

Ўзбекистонда картага нақд пул киритим қилишда ундириладиган комиссиялар бекор қилиниши мумкин. Бу ҳақда 7 май куни бўлиб ўтган брифингда Бизнес-омбудсман ахборот хизмати раҳбари Гулжамол Шукурова маълум қилди.

Унинг сўзларига кўра, йиғилишда 1 апрелдан алкоголь ва тамаки маҳсулотлари, ёқилғи ҳамда 25 млн сўмдан ортиқ товар ва хизматлар учун нақдсиз тўловлар жорий қилингандан кейин юзага келган ҳолатлар муҳокама қилинган.

Аҳоли томонидан банк карталарини нақд пул билан тўлдиришда юқори комиссиялар ундирилаётганлиги юзасидан мурожаатлар кўпайган. Шундан келиб чиқиб, картага нақд пул киритиш ҳамда шахсий карталар ўртасидаги ўтказмалар учун комиссияларни бекор қилиш таклиф этилди.

Март ойида бўлиб ўтган медиа-мулоқотда Марказий банк тижорат банкларининг картага нақд пул киритишда комиссия белгилаш сиёсатига аралашмаслигини билдирган эди. Регулятор раисининг биринчи ўринбосари Нодирбек Сайдуллаевнинг сўзларига кўра, комиссия юқори бўлган банклар ўз мижозларини йўқотмаслиги учун ҳам тарифларни ўзлари қайта кўриб чиқади.

Шунингдек, у банклар ва тўлов ташкилотлари cаш-ин ва cаш-оут банкоматлари сонини кўпайтириши кераклигини таъкидлади. Ҳозирда 17,9 мингдан ортиқ агент махсус терминаллар орқали нақд пулни кирим қилиш ва ечиб олиш хизматларини кўрсатмоқда. Ўша вақтда Марказий банк эндиликда нақд пул билан боғлиқ хизматлар бўйича банк комиссияларини ҳар ой эълон қилиб боришини ҳам маълум қилган эди.