Шавкат Мирзиёев раислигида маҳалла тизимини янада такомиллаштириш ва жойларда ишларни самарали ташкил этиш масалалари юзасидан видеоселектор йиғилиши ўтказилмоқда. Бу ҳақда президент матбуот хизмати хабар берди.

Ташаббусли бюджет бўйича қабул қилинган янги қарор га кўра, маҳаллада одамларнинг ўзи фаол бўлиб бошлаган лойиҳаларга кўмак берадиган тизим жорий қилинди. Бу мақсадлар учун келгуси йилда яна 1 мингта лойиҳага 500 млрд сўм ажратилади.

Шунингдек, жорий йилдан Солиқ қўмитаси ер ва мол-мулк солиқларини тўланганлик даражасига қараб, Энг яхши солиқ тўловчи маҳалла рейтингини эълон қилади. Бунда 100 таликка кирган маҳаллага Ташаббусли бюджетнинг янги тизими бўйича инфратузилма харажатининг 75% и бюджетдан тўлаб берилади. Уларнинг ҳар бирига қўшимча 2 млрд сўмдан ажратилади.

Қонунчилик палатаси депутатларига ўз округидаги маҳаллалар инфратузилмасини яхшилаш учун ҳар бирига 3 млрд сўмдан маблағ берилади.

Маҳалла ҳудудида санитария, экология ва ноқонуний қурилиш бўйича жарималарнинг 10% и маҳалла бюджетига йўналтирилади. Маҳаллалар бюджетига 2026 йилдан бошлаб ҳар йили 200 млрд сўмдан ажратилади.

«Ана шу айтиб ўтган бешта манба ҳисобидан келгуси бир йил учун 2 мингта маҳаллага қўшимча 8,5 трлн сўм маблағ беряпмиз», — деди президент.

Йиғилишда таъкидланишича, охирги йилларда 7,5 млн фуқаро камбағалликдан чиқди, ишсизлик даражаси 2 баробар қисқарди. Бунга маҳаллада «еттилик» тизими жорий қилиниб, моддий ёрдам ажратиш каби 100 дан зиёд хизматлар маҳалла даражасига туширилгандан сўнг эришилди.

Президент маҳаллаларда инфратузилмани яхшилаш масалаларига эътибор қаратиб, ўтган ҳафта имзоланган қарор га мувофиқ, 33 та туман ва 330 та оғир маҳалла белгилаб олинганини айтди.

Бу туманларнинг ҳар бирига 100 млрд сўмдан, 330 та маҳалланинг ҳар бирига эса 5 млрд сўмдан маблағ ажратилади. Жаҳон банки ва Ислом тараққиёт банкидан жалб қилинган $100 млн ҳам мазкур мақсадларга қаратилади.

Бундан ташқари, ушбу туман ва маҳаллалардаги «драйвер» лойиҳалар инфратузилмаси учун яна 2 трлн сўм берилади. Бу дастурни молиялаштириш учун 7 трлн сўмдан зиёд маблағ йўналтирилади.

Вилоят ҳокимларининг ўзи ҳам 2 тадан, туман ҳокимлари эса 1 тадан оғир маҳаллани белгилаб, уларга 5 млрд сўмдан йўналтириши, яна 236 та маҳалла аҳолиси турмушида кескин ўзгариш қилиши шартлиги кўрсатиб ўтилди.