Бугун, 24 октябрь куни Марказий банкда бўлиб ўтган матбуот анжуманида Марказий банк раиси АҚШ Молия вазирлигининг Хорижий активларни назорат қилиш бошқармаси томонидан (OFAC) Россиянинг «Лукойл» ва «Роснефт» компанияларига қарши киритилган санкцияларнинг Ўзбекистонга таъсири ҳақида тўхталиб ўтди.

Ҳар қандай санкция қўллангандан кейин одатда бошқа учинчи давлатларга таъсир қилмайдиган шароит яратиш бўйича доим музокаралар ўтказилади. Мен аминманки, худди шундай амалга оширилади ва умид қиламизки, юқори таъсири бўлмаслиги керак, деди Тимур Ишметов.

​Марказий банк раисининг алоҳида таъкидлашича, Ўзбекистон томони иккиламчи санкцияга тушиш масаласига жуда ҳам жиддий қарайди.

Банкларимиз амалиётларида айнан шу санкциядаги товарлар, ташкилотлар ҳамда банклар билан ишламаслик бўйича қатъий позициямизни айтганмиз, айтиб келганмиз. Буни биз қатъий назорат қиламиз. Ўйлайманки, айнан шундай ишлашимиз ҳозирги пайтда бизнинг банклар биронта санкцияга тушмаслигига олиб келди. Биз бу йўналишда қатъийликни давом эттирамиз, деди у.

​Аввалроқ Тимур Ишметов Ўзбекистон банклари Россия билан боғлиқ санкцияга учраши эҳтимоли ҳақида «хавотир йўқ»лигини айтган эди.

Маълумот учун, АҚШ Молия вазирлигининг Хорижий активларни назорат қилиш бошқармаси (OFAC) Россиянинг «Лукойл» ва «Роснефт» компанияларига қарши санкциялар киритди. Чекловлар урушни якунлаш учун «Россиянинг тинчлик жараёнига жиддий қизиқиши йўқлиги» сабаб жорий этилган. Санкциялар «Лукойл» ва «Роснефт» компанияларининг Россия ҳудудидаги шўба корхоналарига ҳам татбиқ этилган. Умуман олганда, рўйхатда 34 та шўба корхона бор: уларнинг 28 таси «Роснефт»га, 6 таси эса «Лукойл»га тегишлидир.