Бугун, 3 декабрь куни Олий Мажлис Қонунчилик палатаси йиғилишида 2026 йил учун давлат бюджетига оид қонун лойиҳаси биринчи ўқишда қабул қилинди. Унда сўзга чиққан бош вазир ўринбосари, иқтисодиёт ва молия вазири Жамшид Қўчқоров Ўзбекистонда 2026 йил 1 январдан бошлаб қўшилган қиймат солиғидан (ҚҚС) тушган пулларнинг 5 фоизини Тошкент шаҳри, 20 фоизи қолган ҳудудлар маҳаллий бюджетларига ўтказиш режалаштирилаётганини айтди.

«Маҳаллий давлат ҳокимияти органларининг молиявий мустақиллигини ошириш ва маҳаллий бюджетлар даромадини кўпайтириш мақсад қилинган. 2026 йил 1 январдан бошлаб ҚҚСдан тушадиган даромадларнинг Тошкент шаҳри маҳаллий бюджетига 5 фоизи, қолган ҳудудлар бюджетларига эса 20 фоизини ўтказиш кўзда тутилмоқда. Маҳаллий бюджетларга ўтказилган маблағларнинг камида 50 фоизи туман ва шаҳарлар бюджетларига йўналтирилади», — деди вазир.

Таъкидланишича, амалда ҚҚС тушумлари тўлиқ республика бюджетига тушади. Янги тартибга кўра, 2026 йилда маҳаллий бюджетлар ихтиёрида ҚҚС тушумларидан 4,3 трлн сўм маблағ қолдирилиши режалаштирилган. Мазкур ўзгариш ҳудудлардаги ижтимоий-иқтисодий муаммоларни ҳал қилишда кенгроқ самара бериши кутилмоқда.

Солиқ қўмитаси раисининг биринчи ўринбосари Мубин Мирзаев энди ҳудудлар ҚҚС тўловчиларни кўпайтирса, тушумлар ортса, ҳудудлар бюджетида шунча кўпроқ пул қолишини билдирди.