Пулли йўллар Қозоғистон бюджетига 79 млрд тенге олиб келди
Мамлакатда e-Joldar доирасида йўллар учун электрон паспорт шакллантирилмоқда, трассалар сунъий интеллект ёрдамида диагностика қилиняпти, шунингдек, автоматлаштирилган ўлчаш станцияларини ўрнатиш ишлари давом этмоқда.
Қозоғистонда 2025 йилда 13 минг километр йўл таъмирланган ва қурилган. Бу ҳақда мамлакат транспорт вазири Нурлан Сауранбаев ҳукумат йиғилишида маълум қилди.
Унинг таъкидлашича, автомобиль йўллари соҳасида рақамлаштиришга катта эътибор қаратилмоқда: e-Joldar доирасида йўллар учун электрон паспорт шакллантирилмоқда, трассалар сунъий интеллект ёрдамида диагностика қилиняпти, шунингдек, автоматлаштирилган ўлчаш станцияларини ўрнатиш ишлари давом этмоқда. Ҳозирда режалаштирилган 220 та станциядан 71 таси фаолият кўрсатяпти.
Унинг сўзларига кўра, бюджетга юкламани камайтириш мақсадиад мамлакатда пулли йўллар тармоғи босқичма-босқич кенайтирилмоқда. KazToll тизими аллақачон бюджетга 79 миллиард тенге (154,5 миллиард доллар) тушишини таъминлаган.
Ўзбекистондаги илк пулли йўлларнинг қурилиши ҳақида 2018 йилда хабар берилганди. Ўшанда бу каби йўлларнинг биринчисини қуриш билан Германия компанияси шуғулланиши мумкинлиги айтилганди. 2019 йилда Ўзбекистондаги илк пулли трассани қуриш учун жой танланганди.
2022 йил октябрда Тошкент—Андижон ва Тошкент—Самарқанд пулли автомобиль йўллари 2026 йилгача қуриб битказилиши айтилган эди. Август ойида транспорт вазири ўринбосари Илҳом Абдугафаров Жаҳон банки ҳамда Европа тикланиш ва тараққиёт банки лойиҳа координаторлари пулли йўлларни қуриш бўйича қонун лойиҳасини ишлаб чиқиш масаласини муҳокама қилганди.
2023 йилнинг декабрида Тошкент—Самарқанд пулли автомобиль йўлини қуриш лойиҳаси ишлаб чиқилди. Лойиҳанинг дастлабки техник-иқтисодий ҳужжатини ишлаб чиқиш учун Европа тикланиш ва тараққиёт банки томонидан 350 минг доллар миқдорида грант маблағлари ажратилган.
Лойиҳа халқаро стандартларга жавоб берадиган 305 километр узунликдаги автомобиль йўли 6 тасмали автомагистраль талаблари асосида қурилади. Шунингдек, ҳамма туташма ва иншоотлар устидан янги кўприк ва йўл ўтказгичлар қуриш ҳамда интеллектуал транспорт тизимини ўрнатиш кўзда тутилган.
Тошкент—Андижон пулли йўли Тошкент ва бошқа ҳудудларни Фарғона водийси билан боғлашга ёрдам беради. Лойиҳанинг умумий узунлиги 314 километр бўлиб, унинг қиймати 4,65 миллиард долларни ташкил қилади.
