Ўзбекистон енгил автотранспортлар импортида юридик шахслар учун белгиланган нотариф чораларни соддалаштириш орқали жисмоний шахслар номига олиб кириш ҳажмини камайтириш режалаштирилмоқда. Бу ҳақда президентнинг 10 декабрда имзоланган фармонида кўзда тутилган.

Унга кўра, Ўзбекистон техник жиҳатдан тартибга солиш агентлиги (Ўзстандарт), Инвестициялар, саноат ва савдо вазирлиги ҳамда Божхона қўмитаси бу бўйича 2026 йил 1 мартга қадар ҳукумат қарори лойиҳасини тайёрлайди.

Ҳужжатда Транспорт вазирлиги тадбиркорлик субъектларини жалб қилган ҳолда 2026 йил 1 апрелга қадар юк ташиш ва махсус автотранспорт воситалари хизматлари ҳисобини онлайн юритишни назарда тутувчи электрон платформанинг ишлаб чиқарилишини таъминлаши ҳам белгиланган. Платформада жисмоний ва юридик шахсларда мавжуд юк ташиш ва махсус автотранспорт воситалари ҳисоби олиб борилади. Аҳоли ва тадбиркорлик субъектлари томонидан онлайн буюртмалар бериш ва шартнома тузиш ҳамда тўловларни амалга ошириш имконияти бўлади.

Ушбу фармонда 2026 йил 1 апрелдан бошлаб бир қатор йўналишларда, хусусан, кўчмас мулк объектлари, ишлаб чиқарилганига 10 йилдан ошмаган М, Н, О ва G тоифасига кирувчи транспорт воситалари ҳамда махсус автотранспорт воситаларининг олди-сотдисида тўловлар фақат банк карталари ёки электрон тўлов тизимлари орқали амалга оширилиши ҳам кўзда тутилган.