2025 йил ноябрда Ўзбекистонга электромобиллар импорти охирги беш ойдаги энг паст даражага тушди. Бу ҳақда Божхона қўмитаси веб-сайтида маълумот берилган.

Рақамларга кўра, ўтган ойда мамлакатга жами қиймати 68,2 миллион долларлик 4 597 дона электромобиль импорт қилинган. Таққослаш учун, октябрда хориждан 6 933 дона, сентябрда 11 534 та электромобиль олиб келинган.

Республикага электрда ҳаракатланувчи автомобиллар импорти 2025 йил июлдан сезиларли ўса бошлади. Жумладан, июнда чет элдан 4560 дона электромобиль олиб келинган бўлса, июлда бу рақам 7204 донани, августда 8071 донани ташкил этган.

Ноябрь ойида импорт қилинган электромобиллар ҳар бир донасининг ўртача қиймати кескин ошганини кўриш мумкин — 14,8 минг доллар. Мазкур қиймат октябрда 10,3 минг доллардан тўғри келганди. Бундан бир йил илгари — 2024 йил ноябрда эса ҳар бир дона электормобил нархи 6,1 минг доллардан тушган.

Йиллик ҳисобда таққосланса, 2025 йил январь—ноябрь ойларида Ўзбекистонга умумий қиймати 612,2 миллион долларлик 51 856 дона электромобиль импорт қилинган. 2024 йил мос даврида бу кўрсаткич 24 091 дона бўлган (224,7 миллион доллар). Яъни йиллик импорт ҳажми икки баравардан юқори ўсган.