Январь—ноябрь ойларида Ўзбекистонда 419 338 та енгил автомобиль ишлаб чиқарилди, дея хабар берди Миллий статистика қўмитаси.

Мазкур ишлаб чиқариш 2024 йилнинг тегишли даврига нисбатан 9,5% га ошган. UzAuto Motors автотранспорт ишлаб чиқарувчилари орасида етакчи ўрнини сақлаб қолмоқда, бироқ унинг бозордаги улуши 86% дан 74% гача пасайган.

Chevrolet Cobalt ишлаб чиқариш ҳажми бўйича етакчи ўрнини сақлаб қолмоқда — йил бошидан буён 148 мингдан ортиқ автомобиль ишлаб чиқарилган. Бироқ, бу кўрсаткич ўтган йилги натижадан 1,1% пастлигича қолмоқда.

Cobaltʼнинг ойлик ишлаб чиқарилиши қисқа муддатли пасайишдан сўнг яна ўсишни бошлади — 16,3 минг дона автомобилга етди. Бу октябрь ойига нисбатан 3,6% га, 2024 йилнинг ноябрь ойига нисбатан эса 7,3% га юқоридир.

Иккинчи ўринда 85,3 минг донали Damas турибди, бу ўтган йилги кўрсаткичдан 8,2% камдир. Ноябрь ойидаги ишлаб чиқариш ҳажми (9,5 минг дона) олдинги ойга нисбатан деярли 20% га ошган бўлсада, ўтган йилги даражадан анча паст ҳолатда қолмоқда.

Етакчилар учлигини Tracker якунлади — 47,8 минг автомобиль, бу 2024 йилга нисбатан 17,4% кўп. Ноябрь ойида кроссовер ишлаб чиқариш ойлик рекордни янгилаб, 7770 донага етди ва октабр ойи даражасидан учдан бир қисмга ошиб кетди.

Onix ишлаб чиқариш ўсишда давом этди ва ойига 3,5 минг донага етди, бироқ ўтган йилги кўрсаткич (7,3 минг) билан фарқ икки баравардан кўпроқни ташкил этди. 11 ой ичида конвейерлардан 29 мингдан сал кўпроқ янги седанлар чиқди — бу 2024 йилга нисбатан 20% га кам.

Бошқа маркалар орасида энг катта ишлаб чиқариш ҳажми Kia томонидан кўрсатилган — йил бошидан буён 24,5 минг дона (+26,8%). Жанубий Корея брендининг ноябрь ойидаги кўрсаткичлари нисбатан барқарор бўлиб қолмоқда — 2537 та автомобиль.

BYD ишлаб чиқариш ҳажми 17,5 минг донани ташкил этди, улардан 2500 таси ноябрь ойига тўғри келди. Haval автомобилларини ишлаб чиқариш 3,5 баробардан кўпроққа — 8891 донагача ошди ва 8,6 мингта (+37%) автомобиль билан Chery’ни ортда қолдирди.

Бундан ташқари, Ўзбекистонда 49,3 мингта махсус автомобиль ишлаб чиқарилди, бу ўтган йилги кўрсаткичдан икки баравар кўпдир. Улардан ноябрь ойида 5075 та машина ишлаб чиқарилган.