Солиқ ҳисоботини ўз вақтида тақдим этмаганлик учун тадбиркорларга белгиланган маъмурий жарима миқдори камайтирилди. Бу ҳақда Солиқ қўмитаси хабар берди.

Қайд қилинишича, 2026 йил 1 январдан агар тадбиркор ҳисобот даврида бир нечта солиқ турлари бўйича солиқ ҳисоботларини тақдим этмаган бўлса, барча тақдим этилмаган ҳисоботлар бўйича умумий битта жарима қўлланилади. Аввал ҳар бир солиқ ҳисоботини белгиланган муддатдан кечиктириб топшириш ҳолати учун алоҳида жарима қўлланилган.

Шунингдек, солиқ ҳисоботини ўз вақтида тақдим этмаганлик учун белгиланган маъмурий жарима миқдори ҳам камайтирилди: фуқаролар учун — 3 БҲМ дан 1 БҲМ га (412 минг сўм). Кичик тадбиркорлик субъектларининг мансабдор шахслари учун — 10 БҲМ дан 3 БҲМ га (1 236 000 сўм). Амалдаги қонунчиликка мувофиқ, кичик тадбиркорлик субъектлари тоифасига якка тартибдаги тадбиркорлар, микрофирма ва кичик корхоналар киради.

Охирги 3 ойда солиқ ҳисоботларини ўз вақтида тақдим этиб келган тадбиркорлик субъектларига маъмурий жарима қўлланмаган ҳолда солиқ ҳисоботини 5 кунгача кечиктириб топширишга рухсат берилди.