Иқтисодий тадқиқотлар ва ислоҳотлар маркази томонидан 2025 йил якунлари бўйича Ўзбекистондаги бирламчи автомобиль бозорининг динамикаси ва ҳудудий тузилмасига бағишланган шарҳ тақдим этилди.

Таҳлилга кўра, 2025 йил давомида маҳаллий ва импорт ишлаб чиқарилган янги енгил автомобиллар савдоси 5,2 фоизга ошиб, қарийб 370 минг донани ташкил этган.

Ҳудудий кесимда энг юқори фаоллик Сирдарё (45 фоиз), Тошкент (36 фоиз), Наманган (26 фоиз) ва Қашқадарё (21 фоиз) вилоятида қайд этилди.

Шу билан бирга, йил давомида янги енгил автомобиллар реализацияси ҳажми Тошкент шаҳрида, Навоий ва Хоразм вилоятларида камайгани кузатилди.

2025 йил давомида маҳаллий ишлаб чиқарилган янги автомобиллар сегментидаги савдо ҳажми 315 минг донанидан ошди. Шу билан бирга, хорижий ишлаб чиқарилган янги автомобиллар реализацияси тахминан 53,3 минг донани ташкил этди.

Электромобиллар

2025йил давомида янги электромобиллар сотуви 35 фоизга ошиб, 40,7 минг донани ташкил этди. Бу кўрсаткич бозор ўсишини таъминлаган асосий драйверлардан бири бўлди.

Ҳудудий кесимда таҳлил мазкур сегментда фаолликнинг юқори даражада жамланганини тасдиқлайди. Электромобиллар сотувининг асосий қисми Тошкент шаҳрига тўғри келиб, бу ерда 29 мингта янги электромобиль реализация қилинган, яъни умумий ҳажмнинг 71 фоизи.

Кейинги ўринларда Самарқанд вилояти, Тошкент вилояти ҳамда Қашқадарё вилояти қайд этилди.